Avropa

Ana səhifə

Avropa

General Yaşar Dəmirbulaq: “Türk Silahlı Qüvvələrinin təsir gücünü, xalqımızın orduya olan sevgisini aradan qaldırmaq istəyirlər”

04 iyul 2008 12:30 (UTC +04:00)

- Türkiyədə nə baş verir?
- Məhkəmədə və prokurorluqda davam edən istintaq işləri barədə şərh vermək doğru deyil. Ancaq AKP-nin bağlanması ilə bağlı Konstitusiya Məhkəməsində davam edən prosesi siyasi məsələ kimi təqdim edənlər “Ergenekon” deyilən məsələdə hüququn üstünlüyündən danışırlar. Əgər AKP-nin qapadılması siyasi məsələdirsə, “Ergenokon” da siyasi məsələdir, bunların hər ikisinə eyni prizmadan baxmaq lazımdır. Bugünkü mənzərə təəssüf ki, elə deyil. “Ergenokon” məsələsinin xarici qüvvələr tərəfindən tədavülə buraxıldığını söyləyə bilərik. Avropa Birliyi və ABŞ AKP-nin bağlanmasına dair tələbi “məhkəmə çevrilişi” kimi xarakterizə etdilər, “Ergenokon” məsələsini isə Türkiyənin daxili işi adlandıraraq buna qarışa bilməyəcəklərini dedilər. Hətta ittihamnaməni və dəlil-sübutları görmədən “Ergenokon” məsələsinin Türkiyədə demokratiyanı gücləndirəcəyini vurğuladılar. Deməli, xarici qüvvələr bu işin mahiyyətini bilirlər. Onda belə bir sual meydana çıxır: bəs həbs edilənlər və xalq bu işin mahiyyətindən niyə xəbərdar deyil? Burada ssenarinin xaricilər tərəfindən yazılması ehtimalı güclənir. Mənim şəxsi düşüncəmə görə, bu, tamamilə Türk Silahlı Qüvvələrinin təsir gücünü, onun xalqla bütünləşməsini və xalqımızın orduya olan sayğı və sevgisini zədələmək məqsədi güdür.
- Dörd aydır yaşıl loqo ilə çıxan “Taraf” qəzeti hər gün orduya hücum edir. Digər tərəfdən, Avropa Birliyinin nümayəndəsi Lagendayk bildirir ki, həbs olunanlar kiçik balıqlardır, böyük balıqları ələ keçirmək lazımdır. Bunlar nə deməkdir?
- Bu gün “Ergenokon”un nə olduğunu heç kim bilmir. “Ergenokon” türklərin ən qədim dəyərlərindən birinin adıdır. İndi buna “terror təşkilatı” deyirlər. Həbs edilən adamlar nə ilə suçlandıqlarını bilmədikləri halda, Lagendayk deyir ki, indi böyük balıqları tutmaq vaxtıdır. Hansı böyük balıqlar, hansı kiçik balıqlar? Əvvəlcə bunları söyləsin. Əgər o bilirsə, Türkiyəni idarə edənlər bunu niyə bilmir? Lagendayka bunu kim dedi? Bilirsiniz ki, prokurorluğun apardığı istintaq gizlidir. Bu bilgilər Lagendayka necə gedib çatır? Gizlilik yalnız türk xalqına aiddir?
- “Star” qəzetinin yazarı Şamil Tayyar 3 gündə “Ergenekon quldur dəstəsi” adlı kitab çap etdirdi. İstintaqdakı ifadələrin hamısı orada çıxdı. Bu, necə mümkün olur?
- Bunların bir çoxu satılmış və kənardan idarə edilən qələm sahibləridir. Təkrar edirəm, əsas məqsəd ordumuzun etibarını zədələməkdir, başqa heç bir şey yoxdur. Ona görə də ağızlarına gələni danışırlar. Guya 7 iyulda Atatürkçü Düşüncə Dərnəyi xaos yaradacaqmış, çevriliş edəcəkmiş. Əgər 27 ədəd əl bombası ilə çevriliş edilirsə, o zaman bir tankla daha çox iş görmək olar. Bu qədər axmaq bir iddia olmaz. Bu, AKP-nin qapadılması üçün başlayan prosesin bir revanşıdır. Bu günə qədər Türkiyədə heç bir prokurorluq istintaqı 1 il davam etməyib. Sən əvvəlcə adamı həbs et, 1-2 il içəridə saxla, sonra isə ittihamnamə yaz belə bir şey nə hüquqa, nə insanlığa, nə də müasir demokratik düşüncəyə sığır.
- Cümhuriyyət tarixində ikl dəfə olaraq iki ordu generalı saxlanıldı və onlar hazırda polis nəzarətindədirlər.
- Bu, çox böyük problem deyil. Türk Silahlı Qüvvələri öz komandanlarından birini məhkum edib. Keçmiş Dəniz Qüvvələri komandanı İlhami Ərdil həbsxanadan dünən çıxdı, onun ordu admiralı rütbəsi əlindən alındı. Əgər ortada bir suç varsa, hərbi məhkəmə mütləq cəza verir. Silahlı Qüvvələrimiz siyasətçilərin heç vaxt cəsarət edə bilməyəcəkləri işi gördü, ordu admiralını məhkəməyə çıxarıb məhkum etdirdi. Bizim bəzi siyasətçilər isə parlamentdə toxunulmazlıqların ləğvini qətiyyən istəmirlər. Keçmiş parlament sədri deyir ki, “Türkiyə hazırda bağırsaqlarını təmizləyir”. Bir insanın bağırsaqlarını təmizləməsi çox normaldır. Amma pislik bir insanın ağzındadırsa, onu təmizləmək çox çətindir.
Qeyd: Ata-babası İrəvan mahalının Dəmirbulaq kəndindən Qarsa köç etmiş general-leytenant Yaşar Dəmirbulaq 1992-93-cü illərdə Azərbaycan ordusunun quruculuğu prosesində iştirak edib, mərhum prezident Əbülfəz Elçibəyin hərbi məsələlər üzrə müşaviri olub.

Türkiyə_Ergenekon