Avropa

Ana səhifə

Avropa

Türkiyəli ekspert: “Rusiya Saakaşvilinin belini qırdıqdan sonra əməliyyatları dayandıracaq”

11 avqust 2008 10:31 (UTC +04:00)

Ankara. Mayis Əlizadə - APA. Türkiyədəki Avrasiya Strateji Araşdırmalar Mərkəzi Qafqaz ölkələri idarəsinin aparıcı mütəxəssisi Həsən Kanbolatın Gürcüstanda cərəyan edən hadisələrlə bağlı APA-nın Türkiyə bürosuna müsahibəsi

- Bu il fevralın 17-də Kosovonın öz müstəqilliyini elan etməsindən sonra bunun keçmiş sovet ölkələri ərazisindəki separatçı rejimlərə, o cümlədən Qarabağa presedent teşkil edə biləcəyinə dair şərhlər geniş yayılıb. Gürcüstanda baş verən son hadisələrin fonunda siz bunu necə qiymətləndirirsiniz?

- Məncə Azərbaycan bu məsələdə ümumi bir səhvə yol verir. Dünyada müstəqilliyini yenicə əldə edən bütün dövlətləri Qarabağla eyni konsepsiyaya daxil etmək olmaz. Məsələn, Hind okeanı zonasında və Avstraliya materikində müstəqilliyini elan edən kiçik dövlətlər var. Ona görə də məsələyə ümumi nöqteyi-nəzərdən yanaşmağı doğru saymıram. Azərbaycan məsələyə özünün nöqteyi-nəzərindən baxmalıdır. Cənubi Osetiya və Abxaziya münaqişələrini Qarabağ məsələsindən ayırmaq lazımdır. Çünki Azərbaycanın problemi təkcə Qarabağla məhdudlaşmır. Qarabağdan kənarda qalan xeyli Azərbaycan torpaqları da işğal edilib. Söhbət Ermənistanın qonşu ölkə torpaqlarını işğalından gedir. Buna görə də Azərbaycanın haqlılığı heç bir şübhə doğurmur.

- Yaxın saatlarda və günlərdə Gürcüstanda hadisələrin hansı istiqamətdə inkişafını gözləyirsiniz? BMT Təhlükəsizlik Şurasından da bir şey çıxmır.

- Saakaşvili Rusiya Federasiyasına uzun illərdən bəri gözlədiyi fürsəti verdi. Rusiya Gürcüstandakı əməliyyatları ilə Saakaşvilinin belini qıracaq və sonra bu əməliyyatlara son qoyacaq. Saakaşvili iqtidarı illərdən bəri gərginlik siyasəti yürüdürdü. Bundan sonra Abxazlar Yuxarı Kodor bölgəsini tamamilə öz nəzarətlərinə ala bilərlər. Rusiya Gürcüstanın iqtisadi infrastrukturunu çökdürə bilər. Hazırıkı vəziyyət bunu göstərir.

- Hələlik Qərbin müdaxiləsindən söhbət getmir.

- Çünki Qərb bu müharibəni istəmirdi. ABŞ və Avropa Birliyi Saakaşvili iqtidarına bu məsələlərdə tələsməməsi üçün daim xəbərdarlıq edirdi. Qərb ölkələri heç bir müdaxilə etməyəcəklər. Məncə bu, Saakaşvili üçün sonun başlanğıcıdır.

- Bu cür hərbi gedişlərin arxasında həmişə planlaşdırılan başqa gedişlər olur. İndiki oyun Ukraynanın NATO-ya girməsi üçün zəmin hazırlaya bilərmi?

- Əksinə, Saakaşvilinin bu addımı həm Ukraynanın NATO-ya girməsini, həm də Qara dəniz bölgəsinin avroatlantik regiona doğru hərəkətini tormozlayacaq. Yəni Saakaşvili təkcə Gürcüstanın ümidlərini məhv etmədi, Qara dəniz bölgəsindəki digər ölkələri də çətin vəziyyətdə qoydu. Rusiyanın bölgədəki gücü artdı. Bu, çox böyük strateji səhv idi.

Gürcüstan_Rusiya