ABŞ-dan Avropaya gedən və mayeləşdirilmiş təbii qaz (LNG) daşıyan tankerlərin sayı həftəsonu 30%-dən çox artıb.
"APA-Economics"in məlumatına görə, bu barədə "Bloomberg" yazır.
Məlumata görə, dekabrın 24-də ABŞ-dan LNG daşıyan tankerlərin sayı 15 təşkil edib.
Vurğulanır ki, hazırda ehtimala görə Avropaya yollanan daha 14 gəmi yekun göstərişi gözləyir.
Qeyd edək ki, ABŞ-dan Qərbi Avropaya istiqamət götürən LNG tankerlərinin sayının artması Avropa İttifaqında enerji böhranının pisləşməsi ilə əlaqələndirilir.
Xatırladaq ki, ötən gün keçirilən hərracların bağlanmasında Avropada qazın 1 000 kubmetrinin qiyməti 1 200 ABŞ dollarından artıq olub. Dekabrın 21-də isə gün ərzində Avropada qazın qiyməti bir neçə dəfə rekord vuraraq maksimum 2 190,4 dollaradək yüksəlib.