İnfrastruktur

Ana səhifə

İnfrastruktur

Gürcüstanda rusların dağıtdığı dəmir yol körpüsü bərpa edilib

11 sentyabr 2008 12:03 (UTC +04:00)

Bakı. Rəşad Süleymanov – APA-Economics. Bu ilin avqustunda Rusiya hərbi aviasiyası tərəfindən Gürcüstan ərazisində (Kaspi şəhəri yaxınlığında) dağıdılmış dəmir yolu körpüsündə bərpa işləri başa çatıb. Bu barədə «APA-Economics»ə Azərbaycan Dövlət Dəmir Yolunun (ADDY) «Yükdaşıma» İstehsalat Birliyinin rəisi İsfəndiyar Kərimov məlumat verib.

İ.Kərimovun sözlərinə görə, sentyabrın 12-də körpü test olunacaq. Bundan sonra oradan qatarların hərəkətinə icazə veriləcək. Birliyin rəisi onu da deyib ki, Azərbaycandan Gürcüstana dəmir yolu vasitəsi ilə daşınan yüklərin həcmində azalma yoxdur.

“Alternativ körpünün istifadəyə verilməsi nəticəsində Batumiyə göndərilən qatarların sayında azalma, hərəkət qrafikində dəyişiklik olmayıb. Hazırda gün ərzində Bakı-Batumi və əks istiqamətdə orta hesabla 16-20 qatar tərkibi hərəkət edir” - deyə, ADDY rəsmisi bildirib.

Qeyd edək ki, Gürcüstanla Rusiya arasında müharibə birincinin avqustun 8-də Cənubi Osetiya separatçılarına qarşı hərbi əməliyyatlar keçirməsindən sonra başlayıb. Avqustun 8-i günü Cənubi Osetiyaya köməyə gələn Rusiya qoşunları Gürcüstan ərazisinin bir hissəsini, Batumi, Qori, Poti, Senaki və digər şəhərləri tutub. Bombardman zamanı Gürcüstanın bir sıra nəqliyyat və rabitə infrastrukturları, o cümlədən Bakı-Tiflis-Batumi, Bakı-Tiflis-Poti dəmir yollarına ciddi ziyan dəyib.