"S&P": Azərbaycanın ÜDM-i bu il 2,1% artacaq

"S&P": Azərbaycanın ÜDM-i bu il 2,1% artacaq
  • Clock-gray 11:38
  • calendar-gray 23 Yanvar 2021

"S&P Global Ratings" reytinq agentliyinin yenilənmiş proqnozuna əsasən, bu il Azərbaycan iqtisadiyyatı 2,1% artacaq. 2021-2024-cü illərdə isə ölkədə ÜDM-in ortalama artım tempinin 3,9% səviyyəsində olacağı proqnozlaşdırılır.

"APA-Economics"in reytinq agentliyinə istinadən verdiyi məlumata görə, sözügedən artım karbohidrogen ixracında canlanma, stimullaşdırıcı maliyyə paketlərinin köməyi, daxili istehlakdakı bərpa və hökumətin Qarabağa yatırdığı investisiyalar sayəsində dövlət investisiyalarının artımı ilə dəstəklənəcək.

Agentliyin uzunmüddətli proqnozlarına gəldikdə, 2022-ci ildə ölkədə ÜDM-in artım tempi 5,7%-dək yüksələcək. 2023-cü və 2024-cü illərdə isə ÜDM-in müvafiq olaraq 3,7% və 2,2% artacağı proqnozlaşdırılır.

"Neftdən qaynaqlanan xarici volatilliyə baxmayaraq, Azərbaycanın güclü xarici balansı, Azərbaycan Respublikası Dövlət Neft Fondunda (ARDNF) toplanan böyük həcmdə xarici aktivlərlə möhkəmləndirilmiş əsas reytinq gücü olaraq qalacaq", - deyə agentlik qeyd edir.

Xatırladaq ki, 2020-ci ildə Azərbaycanda ÜDM-in həcmi 2019-cu il ilə müqayisədə 4,3% azalaraq 72 432,2 mln. manat təşkil edib. Bu, son 3 ilin ən aşağı göstəricisidir.

Mirsəid İbrahimzadə

Digər xəbərlər