Şou-biznes

Şou-biznes

Bu gün “Eurovision-2011” yarışmasında Azərbaycan təmsilçisinin seçilməsi üçün keçirilən seçimlərin yarımfinal mərhələsinin ilk qalibi məlum olacaq – FOTOSESSİYA

19 noyabr 2010 12:26 (UTC +04:00)

Bakı. Ülkər Qasımova - APA. Gələn ilin mayında Almaniyanın Düsseldorf şəhərində baş tutacaq “Eurovision-2011” yarışmasında Azərbaycanı təmsil edəcək şəxsin seçilməsi üçün keçirilən seçimlərin yarımfinal mərhələsinin ilk həftəsi bu gün başa çatacaq. APA-nın məlumatına görə, noyabrın 15-dən start götürən yarımfinal mərhələsinin ilk həftəsində 11 iştirakçı mübarizə aparmalı olsa da, ilk gündən 10 nəfər canlı efirə gəlib.
İlk həftədə perfomansını birinci olaraq nümayiş etdirməli olan Nuranə Ələsgərova səhhətindəki problemlər səbəbindən çıxış edə bilməyib. Yarımfinalın növbəti günü isə ilk həftənin birinci günü Türkiyədən bu seçimlərdə iştirak etmək üçün Bakıya gələn Tarık Yigit də ikinci gün canlı yayıma qatılmayıb. Tarık Yigitin bu addımının səbəbi açıqlanmasa da, onun sonradan bu istəkdən imtina etdiyi deyilir.
İlk həftədə 11 nəfər iştirakçıdan 9-u sona kimi mübarizə aparıb. Həftə ərzində yarımfinal mərhələsinin ilk həftəsində mübarizə aparan 9 iştirakçı - Ülviyyə Abbasova, Çingiz Mustafayev, Tofiq Hacıyev, “Next” qrupu, Aygün İsmayılova, Adil Baxışlı, Zülfünaz Rəcəbova və Xana Həsənova öz istedadlarını nümayiş etdiriblər.
Münsiflər heyətinin üzvlərinin kimliyi canlı yayımda da gizli saxlanılır və canlı efirin sonuna kimi də bu cür davam edəcək. 50% münsiflər heyətinin səsi, 50% isə tamaşaçı səslərinin sayı ilə həftə ərzində birincilik uğrunda mübarizə “Next” qrupu və Çingiz Mustafayev arasında gedib. Ötən gün isə “Next” qrupu ən yüksək səs faizi ilə günün birincisi olub. Bu gün ilk həftənin 9 iştirakçısından hansının finala vəsiqə qazanacağı məlum olacaq.

Qeyd edək ki, yarımfinal mərhələsi bundan sonra 6 həftə də davam edəcək. Hər həftə 11 namizəd öz istedadlarını nümayiş etdirəcək və səsvermə yolu ilə 7-dən 1-i finala keçəcək. Azərbaycanın “Eurovision-2011” müsabiqəsindəki təmsilçisi həmin o 7 nəfər arasından seçiləcək.