Sənaye və energetika

Ana səhifə

ARDNŞ və Aurora Progress Fucayra limanında əməkdaşlığa başlayıblar

19 may 2010 22:06 (UTC +04:00)

Bakı-APA. ARDNŞ və İsvecrənin “Aurora Progress” əmtəə ticarət evi Birləşmiş Ərəb Əmirliyinin Fucayra limanında tikilməkdə olan yeni 641 000 kubmetrlik neft məhsulları anbarı terminalı da daxil olmaqla neft anbarı müəssisələrinin inkişafında tərəfdaşlıq edəcəklər. Bu barədə APA socar.az saytına istinadən məlumat yayır. Məlumatda deyilir ki, bu addım ARDNŞ-nin beynəlxalq mövqeyinin möhkəmlənməsinə hesablanıb. Məlum olduğu kimi, ARDNŞ dünya bazarlarına inamla daxil olmaq məqsədi ilə güclü və davamlı resurs bazası yaratmağı nəzərdə tutur. Fucayra inkişaf həcmlərinin əsaslı şəkildə artdığı ticarət mərkəzlərindən biridir və burada əlverişli mövqe tutmaq ARDNŞ-nin gələcək inkişafı üçün strateji üstünlük qazandıran amil kimi qiymətləndirilir. Əməkdaşlıq çərçivəsində müştərilərə yüksək səviyyəli xidmət göstərilməsinə imkan verən çən anbarı əməliyyatları əsas götürülür. Eyni zamanda SOCAR-Trading mövcud terminallarda istehsal gücünün müəyyən hissəsini icarəyə götürmək perspektivini də istisna etmir. Hazırda tərəflər əsas diqqəti terminalın inşası üçün hazırlıq işlərinə yönəltmişlər. Terminalın “SOCAR AURORA Fujairah Terminal” adlandırılmasına qərar verilmişdir. Ümumi həcmi 641 000 m3 təşkil edən 20 çənlik anbardan ibarət “SOCAR AURORA Fujairah Terminal”ı neft yanacağı, qazolin, kerosin və orta distillyatlar (dizel, qazoil və reaktiv kerosin) qəbul etmək gücünə malikdir. Terminal çənlər üzrə axın qarışığı avadanlıqları ilə təchiz olunacaq. Bununla da, “SOCAR AURORA Fujairah Terminal” müstəqil operator qismində üçüncü tərəflərə neft məhsulları saxlama həcmlərini təklif edə biləcəkdir. Bu il Fucayra limanında neft tankerlərinin qəbulu və yüklənməsi üçün çoxsaylı gəmi yanalma məntəqələrinin istifadəyə veriləcəyi gözlənilir. SOCAR AURORA Fujairah Terminal”ı Fucayranın enerji mərkəzində yeni gəmi yükləmə imkanlarından faydalanan ilk şirkət kimi də öz mövqeyini möhkəmləndirəcək. Tərəflər Terminalın 2011-ci ilin əvvəllərindən fəaliyyətə başlayacağını planlaşdırırlar.

Qeyd edək ki, Aurora Progress S.A. öz əsas fəaliyyəti kimi neft məhsullarının satışı, tədarükü, nəqli və saxlanılması ilə məşğul olan özəl İsveçrə şirkətidir. Tarixi Petrotex S.A. şirkətinin yarandığı 1978-ci ilə gedib-çıxır; Petrotex S.A və onun filiallarını əldə etdikdən sonra Aurora Progress qlobal ticarət şirkəti kimi genişlənməyə davam etmişdir. Bü gün Qrupun əsas ticarət qolu olan Aurora Petroleum Trading & Supply S.A. şirkəti neft məhsullarının satışı və tədarükü ilə məşğul olur.