Bakı – APA. Mayın 6-8-də Bakıda keçiriləcək cüdo üzrə “Böyük dəbilqə” turnirinin yerli Təşkilat Komitəsinin hesabat xarakterli iclası baş tutub. Azərbaycan Cüdo Federasiyasından (ACF) apasport.az saytına verilən məlumata görə, tədbirdə gənclər və idman naziri Azad Rəhimov və ACF-in prezidenti Rövnəq Abdullayev də iştirak ediblər.
İclasda komitə üzvləri turnirə hazırlıqla bağlı görülən işlər haqda geniş məlumat veriblər. Eyni zamanda, bundan sonra hazırlıq işlərinin davam etdirilməsi və görüləcək işlərlə bağlı müxtəlif təkliflər səsləndirilib, müzakirə olunub.
ACF-in vitse-prezidenti Sadıq Sadıqov çıxış edərək bildirib ki, “Böyük dəbilqə” turnirində 86 ölkədən 552 idmançı mübarizə aparacaq. O, görülən işlər haqda məlumat verib və qeyd edib ki, Azərbaycan idman ölkəsi olaraq belə tədbirin keçirilməsində böyük təcrübəyə malikdi: “Biz bu təcrübədən istifadə edərək möhtəşəm turniri də yüksək səviyyədə təşkil edəcəyik. Beynəlxalq Cüdo Federasiyasının işçi qrupu da ölkəmizdə olub. Onlar görülən işlərlə tanış olublar, baxış keçiriblər və bəyəniblər”.
Vitse-prezident sonda onu da vurğulayıb ki, işçi qrupunun razı qalması və müsbət fikri də işlərin istənilən səviyyədə getdiyindən xəbər verir.
Tədbirin sonunda “Böyük dəbilqə”nin keçiriləcəyi günlər ərzində qonaqların qəbulu, yerləşdirilməsi, otel, qidalanma və xüsusilə də təşkilati işlərin həyata keçirilməsi məsələləri müzakirə edilib.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
