Bakı. Mübariz Aslanov - APA. Ukraynanın Xerson şəhərində azərbaycanlı iş adamı Vüqar Nuruşovun qətli ilə bağlı məhkəmə yekunlaşıb.
V. Nuruşovun qardaşı İlqar Nuruşov APA-ya bildirib ki, əvvəlki proseslərin birində zaminə buraxılan Rostislav Brinski qətldə təqsirli bilinərək, məhkəmənin hökmü ilə 13 il müddətinə azadlıqdan məhrum edilib.
İ. Nuruşov onu da bildirib ki, istintaq zamanı qətldə sifarişçi və iştirakçı kimi adı hallanan erməni iş adamı, istefada olan general Anton Luqasyan və onun qohumu Narok Ovanesyan isə cəzasız qalıb.
Xersonda yaşayan azərbaycanlıların bundan narazı qaldıqlarını bildirən İ. Nuruşov deyib ki, buna səbəb erməni lobbisinin Ukraynada güclü olması, məhkəməyə təzyiqlər edilməsidir: “Brinski özü də həbsxanadan bizə ismarıc göndərib ki, ona təzyiqlər olub, ona görə qətli üzərinə götürüb. Qətldə əli olan ermənilərin toxunulmaz qalmaları biz azərbaycanlılar üçün ciddi təhlükə yaradır”.
Qeyd edək ki, əslən Azərbaycanın Beyləqan rayonundan olan iş adamı, 1976-cı il təvəllüdlü Nuruşov Vüqar Qiyas oğlunun üzərində işgəncə əlamətləri olan meyiti 2015-ci il avqustun əvvəlində Xerson şəhəri yaxınlığında aşkarlanıb.
Ötən il avqustun 17-də isə vilayət azərbaycanlıları Konqresinin sədr müavini, iş adamı İlham Tağıyev öldürülüb. Onun qətli ilə bağlı milliyyətcə erməni olan Karapetyan Sergey Razmikoviç və Montiyan Xaçik Stepanoviç, o cümlədən azərbaycanlı Allahverdiyev Naim Balakişi oğlu və İlham Məmmədov saxlanılıb.
Yaxınları onun da qətlinin sifarişçisinin A. Luqasyan olduğunu iddia edirlər.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
