İnfrastruktur

Ana səhifə

İnfrastruktur

Azərbaycan İrana aviareyslərin sayının artırılmasında maraqlıdır

01 dekabr 2016 12:34 (UTC +04:00)

İqtisadiyyat naziri, Azərbaycan və İran arasında iqtisadi, ticarət və humanitar sahələr üzrə Dövlət Komissiyasının həmsədri Şahin Mustafayev Azərbaycanda səfərdə olan İranın rabitə və informasiya texnologiyaları naziri, Dövlət Komissiyasının həmsədri Mahmud Vaezi ilə görüşüb.

İqtisadiyyat Nazirliyindən “APA-Economics”ə verilən məlumata görə, görüşdə İran nümayəndə heyətinin dekabrın 26-28-də ölkəmizə nəzərdə tutulan səfərinə, səfər çərçivəsində Azərbaycan və İran arasında iqtisadi, ticarət və humanitar sahələr üzrə Dövlət Komissiyasının 11-ci iclasının və Azərbaycan-İran biznes forumunun keçirilməsinə, eləcə də qarşılıqlı maraq doğuran digərə məsələlərə dair müzakirələr aparılıb.

Ş. Mustafayev Azərbaycan və İran arasında siyasi əlaqələrin yüksək səviyyədə olduğunu, əməkdaşlığın bütün sahələrdə inkişaf etdiyini, əlaqələrin genişlənməsində Azərbaycan və İran prezidentlərinin siyasi iradəsini vurğulayıb. Səhiyyə, maliyyə, bank, nəqliyyat, ticarət sahələrində mövcud əlaqələrə və əməkdaşlığın genişləndirilməsinə dair fikirlərini bildirən Şahin Mustafayev Şimal-Cənub nəqliyyat dəhlizinin önəmli həlqələrindən olan Astara çayı üzərində dəmir yolu körpüsünün və Astara stansiyasından (Azərbaycan) İran sərhədinədək olan 8,3 km-lik dəmir yolu xəttinin tikintisinin yekunlaşmaq üzrə olduğunu qeyd edib. Diqqətə çatdırılıb ki, nəqliyyat dəhlizinə bir sıra ölkələr də maraq göstərir.

Ş. Mustafayev vurğulayıb ki, Azərbaycan-İran ticarət əlaqələri inkişaf edir və bu sahədə əməkdaşlığın genişləndirilməsi üçün böyük potensial var. Azərbaycan tərəfi Bakı və Tehran arasında uçuşların sayının artırılmasında, İranın digər şəhərlərinə də birbaşa uçuşların təşkilində maraqlıdır.

M. Vaezi "Bakutel-2016" sərgi və konfransında iştirak məqsədilə ölkəmizdə səfərdə olduğunu və 10-a yaxın İran şirkətinin sərgidə iştirak etdiyini qeyd edib. Nazir səfəri çərçivəsində Azərbaycan prezidenti ilə görüşdüyünü və ikitərəfli əlaqələrin inkişafı istiqamətində müzakirələrin aparıldığını vurğulayıb. Son zamanlar ölkələrimiz arasında əməkdaşlığın inkişafı istiqamətində bir çox işlərin görüldüyünü qeyd edən iranlı nazir əlaqələrin genişləndirilməsi perspektivlərinə və Dövlət Komissiyasının növbəti iclasında müzakirə ediləcək məsələlərə dair fikirlərini bildirib.