Birja

Ana səhifə

Birja

Sentyabrın əvvəlinə Azərbaycanın fond bazarında fəallıq aşağı səviyyədədir

01 sentyabr 2008 15:07 (UTC +04:00)

Bakı. Vahab Rzayev – APA-Economics. Azərbaycan Milli Bankının (AMB) buraxdığı qısamüddətli notlarının fond bazarında dövriyyədə olan həcmi 2008-ci ilin sentyabr ayının 1-nə 35 766,6 min manat təşkil edib.
Bakı Fond Birjasından (BFB) «APA-Economics»ə verilən məlumata görə, hazırda dövriyyədə 4 not buraxılışı var və həmin buraxılışların nominal üzrə ümumi həcmi 135 mln. manat təşkil edir. Beləliklə, dövriyyədə olan 4 buraxılış üzrə yerləşdirmə 35 766,6 min manat, yəni avqust ayında notlar üzrə yerləşdirmənin nisbi həcmi 26,49% təşkil edib. Bu göstərici bazarın fəallığını əks etdirir və bunu nəzərə alaraq qeyd etmək olar ki, hazırda not bazarında fəallıq aşağı səviyyədədir.
Məlumat üçün qeyd edək ki, hazırda (son hərracın nəticələrinə görə) notlar üzrə ortaölçülmüş qiymət üzrə gəlirlik 11,41% təşkil edir, bu da cari makroiqtisadi vəziyyəti nəzərə alaraq, aşağı göstərici kimi qiymətləndirilir.
Qeyd edək ki, notlar üzrə yerləşdirmə səviyyəsi qənaətbəxş kimi qiymətləndirilməsə də, Maliyyə Nazirliyi tərəfindən buraxılan dövlət qısamüddətli istiqrazları (DQİ) üzrə müvafiq göstərici daha yüksək səviyyədədir. Belə ki, hazırda dövriyyədə olan 47 DQİ buraxılışının ümumi həcmi 261 mln. manat, dövriyyədəki həcmi 235,815 mln. manat, nisbi həcmi isə 90,3% təşkil edir. DQİ-lər üzrə cari gəlirlik (son hərracın nəticələrinə görə) 11,50%-ə bərabərdir.