Birja

Ana səhifə

Birja

Dünya bazarında neftin qiyməti 70 dollardan da aşağı düşüb

17 oktyabr 2008 08:33 (UTC +04:00)

Bakı. Vahab Rzayev - APA-Economics. Oktyabrın 16-da Nyu-Yorkun NYMEX əmtəə birjasında keçirilən hərracın gedişində WTI neftinin ixracına dair noyabr müqaviləsinin dəyəri 4,69 dollar və ya 6,3% enərək 1 barelə görə 69,85 dollar təşkil edib.
«APA-Economics»in məlumatına görə, ICE London qitələrarası birjasında noyabrda ixrac etməklə Brent markalı neftin 1 barelinin dəyəri 4,48 dollar – 66,32 dollaradək enib.
Neftin qiymətinin 14 aylıq minimuma enməsinin bir sıra səbəbi var. İlk növbədə investorlar ABŞ və Avropa iqtisadiyyatının tənəzzül vəziyyətinin daha da dərinləşəcəyini gözləyirlər. Analitiklər hesab edirlər ki, maliyyə sisteminin xilasetmə proqramları yalnız qısamüddətli nəticə verəcək və böhran artıq təkcə maliiyə sektoru üzrə deyil, bütövlükdə iqtisadiyyatı əhatə edir. Artıq istehsalat və istehlak sahələri böhran içindədir. ABŞ-ın makroiqtisadi statistikası da bunu təsdiqləyir. Belə ki, sentyabrda ABŞ-da sənaye istehsalı avqustla müqayisədə 2,8%, illik isə 4,5% enib.
Bundan əlavə neft qiymətlərinə ABŞ-da neft və neft məhsulları ehtiyatlarının həcmi təsir edib. ABŞ-ın Energetika Nazirliyinin məlumatına görə, neft ehtiyyatları ötən həftə ərzində 5,6 mln. barel artaraq 308,2 mln. barelə çatıb. Benzin ehtiyyatları isə 7 mln. barel artaraq 125,4 mln. barelə çatıb.