Birja

Ana səhifə

Birja

Dünya bazarlarında neftin qiyməti 39 dollardan aşağı enib

24 dekabr 2008 07:06 (UTC +04:00)

Bakı. Vahab Rzayev - APA-Economics. Dekabrın 23-də Nyu-Yorkun NYMEX əmtəə birjasında keçirilən ticarətin gedişində WTI neftinin ixracına dair fevral müqaviləsinin dəyəri 0,93 dollar və ya 2,33% azalaraq 1 barelə görə 38,98 dollar təşkil edib.
«APA-Economics»in məlumatına görə, ICE London qitələrarası birjasında fevralda ixrac etməklə Brent markalı neftin 1 barelinin dəyəri isə 1,09 dollar azalaraq 40,36 dollar təşkil edib.
Neft bazarında enmə prosesləri davam edir, çünki dünya iqtisadi böhranı nəticəsində neftə tələbat azalır və qiymətlərə yeganə təsir aləti olan neft hasilatının azaldılması hələ də fayda vermir. Dekabrın 23-də OPEC-in prezidenti Şakib Xəlil bəyan edib ki, Təşkilata üzv ölkələr yaxın vaxtlarda dekabrın 17-də qəbul olunan öhdəlikləri yerinə yetirməlidir, çünki əks halda onlar daha da kəskin qiymət azalması ilə üzləşəcək. Ş.Xəlilin sözlərinə görə, OPEC rəhbərliyi fevral ayına qədər öhdəliklərin icrasını 80%, mart ayına qədər isə 100%-ə çatdırmalıdır. Qeyd edək ki, o vaxta qədər OPEC tərəfindən hasilatın yenidən azaldılması barədə qərarın qəbul edilməsi istisna olunmur və bununla bağlı öhdəliklərin icrası qərarların qəbul edilməsindən geri qalmaqla bu qərarları əhəmiyyətsiz edir. Ş.Xəlil vurğulayıb ki, yanvarın 10-da Küveytdə ərəb ölkələrinin sammiti keçiriləcək ki, orada neftin qiyməti ətrafında müzakirə aparılacaq və OPEC-in fövqaladə iclasının çağırılması barədə qərar qəbul edilə bilər.
Qeyd edək ki, Ş.Xəlilin fikrincə, OPEC-in sentyabr və oktyabr aylarında hasilatın azaldılmasına dair qərarlar qəbul etməsə idi, neftin 1 bareli artıq 20 dollara qədər ucuzlaşa bilərdi.