Birja

Ana səhifə

Birja

Dow Jones indeksi 0,5% enib, S&P 500 0,5%, Nasdaq isə 0,8% yüksəlib

26 yanvar 2009 06:55 (UTC +04:00)

Bakı. Vahab Rzayev - APA-Economics. Yanvarın 23-də Amerika fond bazarında Dow Jones indeksi 0,5% - 8077,56 bəndədək enib, S&P 500 0,5% - 831,95 bəndədək, Nasdaq isə 0,8% - 1477,29 bəndədək yüksəlib.
«APA-Economics»in məlumatına görə, yanvarın 23-də ABŞ fond bazarında kotirovkaların dəyişməsinə iri şirkətlərin rüblük hesabatları səbəb olub. Məsələn, «General Electric» korporasiyasının xalis mənfəəti 44% azalıb ki, bu da səhmlərin 11% ucuzlaşmasında əks olunub. «Harley Davidson» şirkətinin gəlirlərinin azalması səbəbindən 1,1 min iş yerini ixtisar etmək niyyəti şirkətin səhmlərini 7,2% ucuzlaşdırıb. Eyni zamanda, investorlar prezident B.Obamanın iqtisadiyyatın bərpasına yönəldilən tədbirlər planına böyük ümidlər bəslədiyindən kotirovkaların kəskin enməsi baş verməyib.
Avropa bazarlarında yanvarın 23-də Britaniya FTSE 100 indeksi 0,01% - 4052,47 bəndədək yüksəlib, Fransa CAC-40-ı 0,71% - 2849,14 bəndədək, Almaniya DAX-ı isə 0,96% - 4178,94 bəndədək enib. Avropanın fond bazarlarına makroiqtisadi göstəricilər təsir edib. Belə ki, Böyük Britaniyada ÜDM 2008-ci ilin IV rübündə əvvəlki rübə nisbətən 1,5%, 2007-ci ilin eyni dövrü ilə müqayisədə isə 1,8% azalıb. Mənfi makroiqtisadi göstəricilər, o cümlədən məşğulluq sahəsində, İspaniyada da müşahidə olunub. Bununla yanaşı, bir sıra şirkətlərin gözləmələrdən daha müsbət olan maliyyə hesabatları kotirovkaları tarazlaşdırıb.
Dünya bazarında avronun dollara qarşı məzənnəsi 1,2936 (-0,45%) dollar təşkil edir.