Birja

Ana səhifə

Birja

Dow Jones indeksi 2,5%, S&P 500 3,3%, Nasdaq isə 3,5% yüksəlib

29 yanvar 2009 07:24 (UTC +04:00)

Bakı. Vahab Rzayev - APA-Economics. Yanvarın 28-də Amerika fond bazarında Dow Jones indeksi 2,5% - 8375,45 bəndədək, S&P 500 3,3% - 874,09 bəndədək, Nasdaq isə 3,5% - 1558,34 bəndədək yüksəlib.
«APA-Economics»in məlumatına görə, yanvarın 28-də ABŞ fond bazarında əsasən bankların səhmlərinin bahalaşması müşahidə olunub. Buna səbəb prezident Barak Obamanın administrasiyası tərəfindən gələn həftə təqdim olunması nəzərdə tutulan kredit təşkilatlarının problemli aktivlərinin əldə edilməsi ilə məşğul olan «pis bankın»” yaradılması barədə planın açıqlanmasına dair məlumatlar olub. Bundan başqa, Federal Ehtiyat Sistemi tərəfindən əsas faiz dərəcəsinin 0-0,25% diapazonunda saxlanması da maliyyə sektoru tərəfindən müsbət qarşılanıb. Nəticədə, «Citigroup»un səhmləri 18,6%, «Bank of America»nın səhmləri 13,7%, «Wells Fargo» bankın səhmləri isə 30,9% bahalaşıb.
Problemli aktivlərin bir bankda toplanması planları Avropa fond bazarlarına da müsbət təsir edib. Belə ki, Avropa bazarlarında yanvarın 28-də Britaniya FTSE 100 indeksi 2,40% - 4295,20 bəndədək, Fransa CAC-40-ı 4,11% - 3076,01 bəndədək, Almaniya DAX-ı isə 4,52% - 4518,72 bəndədək yüksəlib. Avropada «Lloyds Banking Group»un səhmləri 50,4%, «Deutsche Bank»ın səhmləri 22%, «BNP Paribas»ın səhmləri 20,8% bahalaşıb.
Dünya bazarında avronun dollara qarşı məzənnəsi 1,3122 (-0,90%) dollar təşkil edir.