Birja

Ana səhifə

Birja

Dünya bazarında neft 58 sent bahalaşıb

29 yanvar 2009 08:47 (UTC +04:00)

Bakı. Vahab Rzayev – APA-Economics. Yanvarın 28-də Nyu-Yorkun NYMEX əmtəə birjasında keçirilən ticarət əməliyyatlarının gedişində WTI neftinin ixracına dair mart müqaviləsinin dəyəri 0,58 dollar və ya 1,4% artaraq 1 barelə görə 42,16 dollar təşkil edib.
«APA-Economics»in məlumatına görə, yanvarın 28-də ICE London qitələrarası birjasında fevralda ixrac etməklə Brent markalı neftin 1 barelinin dəyəri isə 0,62 dollar artaraq 44,35 dollar təşkil edib.
Yanvarın 28-də neft bazarına əsasən iki əks istiqamətli amillər təsir edib. Dünya ölkələrinin Davos forumunda bir araya gələrək böhrana qarşı çıxması, ABŞ Konqresinin 819 mlrd. dollar həcmində iqtisadiyyatın stimullaşdırılması planını təsdiq etməsi və digər amillər dünya iqtisadiyyatının bərpa olunacağı ilə bağlı birjalarda optimistik əhval yaradıb. Digər tərəfdən isə reallıq bazarda mənfi tendensiyalar yaradır. Belə ki, ABŞ-ın Energetika məlumatları İdarəsinin ötən həftə ölkədə neft ehtiyatlarının 6,2 mln. barel artaraq 338,9 mln. barelə çatması xəbəri bazar iştirakçıları tərəfindən mənfi qarşılanıb. Nəticədə, bu iki amil tarazlığa gələrək neftin qiymətini bir qədər yüksəldib.