Birja

Ana səhifə

Birja

Dow Jones indeksi 4,6%, S&P 500 4,9%, Nasdaq isə 4,2% enib

11 fevral 2009 07:32 (UTC +04:00)

Bakı. Vahab Rzayev - APA-Economics. Fevralın 10-da Amerika fond bazarında Dow Jones indeksi 4,6% - 7888,88 bəndədək, S&P 500 4,9% - 827,16 bəndədək, Nasdaq isə 4,2% - 1524,73 bəndədək enib.
«APA-Economics»in məlumatına görə, beləliklə, fond bazarı fevralın 10-da ABŞ-ın yeni administrasiyası tərəfindən hazırlanan 838 mlrd. dollarlıq iqtisadi planın Senat tərəfindən qəbul edilməsinə bu cür reaksiya verib. Sözügedən stimullaşdırma proqramı vergi güzəştləri, infrastruktur layihələrə məqsədli xərclər, banklardan «pis aktivlərin» birgə, özəl və dövlət mexanizmi vasitəsi ilə geri alınması və digər tədbirləri nəzərdə tutur. İnvestorlar tərəfindən bu addımların iqtisadiyyatın bərpası üçün kifayyət etməyəcəyi ehtimallarla bağlı səhmlər bazarı enmə nümayyiş etdirib. Maraqlıdır ki, planın iri olması müsbət deyil, əksinə olaraq planda nəzərdə tutulmuş məbləğ iqtisadiyyatda və maliyyə sektorunda problemlərin miqyasını göstərərək, mənfi təsir edib.
Avropa bazarlarında fevralın 10-da Britaniya FTSE 100 indeksi 2,19% - 4213,08 bəndədək, Fransa CAC-40-ı 3,64% - 3020,75 bəndədək, Almaniya DAX-ı isə 3,46% - 4505,54 bəndədək enib. Avropa bazarlarında neft şirkətləri, dağmədən şirkətləri, avtomobil istehsalçılarının səhmləri ucuzlaşıb. Belə ki, dağmədən sahəsinin dünya liderləri olan «BHP Billiton»un səhmləri 4,9%, «Xstrata Plc.»nin səhmləri 8,8%, «Anglo American Plc.»nin səhmləri 6%, neft sahəsində «Total»in səhmləri 3,6%, BP-nin səhmləri 1,7%, «Royal Dutch/Shell»in səhmləri 2%, avtomobil istehsalçılarından isə «Peugeot Citroen»in səhmləri 5,3%, «Volvo»nun səhmləri 5,6%, «Volkswagen»in səhmləri 2,3% ucuzlaşıb.
Dünya bazarında avronun dollara qarşı məzənnəsi 1,2881 (-0,56%) dollar təşkil edir.