Birja

Ana səhifə

Birja

Dow Jones indeksi 3,3%, S&P 500 4%, Nasdaq isə 3,9% yüksəlib

25 fevral 2009 07:20 (UTC +04:00)

Bakı. Vahab Rzayev - APA-Economics. Fevralın 24-də Amerika fond bazarında Dow Jones indeksi 3,3% - 7350,94 bəndədək, S&P 500 4% - 773,14 bəndədək, Nasdaq isə 3,9% - 1441,83 bəndədək yüksəlib.
«APA-Economics»in məlumatına görə, ABŞ-ın fond bazarında əsasən maliyyə qurumlarının səhmlərinin kotirovkaları yüksəlib ki, bu da Federal Ehtiyat Sisteminin başçısı Ben Bernankenin bəyanatlarından sonra baş verib. Qeyd edək ki, B.Bernanke öz çıxışında ölkə iqtisadiyyatında geriləmənin 2009-cu ildə sona çatacağı, gələn il isə iqtisadiyyatın bərpasının başlanacağını vurğulayıb. Həmçinin, B.Bernanke son zamanlar bazar iştirakçılarını narahat edən bankların milliləşməsi məsələsinə aydınlıq gətirərək bəyan edib ki, buna heç bir ehtiyac yoxdur. Nəticədə, «Citigroup»un səhmləri 18,2%, «Bank of America»nın səhmləri 20,9%, «JPMorgan»ın səhmləri 7,7% bahalaşıb.
Eyni zamanda, ABŞ-ın son makroiqtisadi göstəriciləri mənfi olub. Belə ki, ölkənin istehlak etibarlılığı indeksi fevralda 37,4 bənddən 25 bəndədək azalıb ki, bu da indeksin hesablanması tarixi ərzində, yəni 1967-ci ildən ən kiçik göstəricidir.
Avropa bazarlarında fevralın 24-də Britaniya FTSE 100 indeksi 0,89% - 3816,44 bəndədək, Fransa CAC-40-ı 0,73% - 2708,05 bəndədək, Almaniya DAX-ı isə 0,23% - 3895,75 bəndədək enib. Avropa bazarlarına dünya iqtisadiyyatının geriləməsinin dərinləşməsi barədə ehtimallar və şirkətlərin mənfəətlərinin azalması mənfi təsir göstərib.
Dünya bazarında avronun dollara qarşı məzənnəsi 1,2833 (+0,86%) dollar təşkil edir.