Birja

Ana səhifə

Birja

Neftin qiyməti 9% yüksəlib

05 mart 2009 07:13 (UTC +04:00)

Bakı. Vahab Rzayev – APA-Economics. Martın 4-də Nyu-Yorkun NYMEX əmtəə birjasında keçirilən ticarət əməliyyatlarının gedişində WTI neftinin ixracına dair aprel müqaviləsinin dəyəri 3,73 dollar və ya 9% artaraq 1 barelə görə 45,38 dollar təşkil edib.
«APA-Economics»in məlumatına görə, martın 4-də ICE London qitələrarası birjasında apreldə ixrac etməklə Brent markalı neftin 1 barelinin dəyəri isə 2,42 dollar artaraq 46,12 dollar təşkil edib.
Neftin qiymətinin yüksəlməsinə əsasən ABŞ-da neft ehtiyatlarının azalmasına dair açıqlanan rəsmi məlumatlar təsir edib. Belə ki, bu günlərdə açıqlanan tam rəsmi hesab olunmayan Amerika Neft İnstitutunun məlumatlarından sonra bu barədə Enerji İnformasiya İdarəsi də analoji bəyanatla çıxış edib. Belə ki, İdarənin məlumatlarına görə, ötən həftə ölkədə neft ehtiyatları 700 min barel azalaraq 350,6 mln. barelə çatıb. Eyni zamanda, benzin ehtiyatları 200 min barel artaraq 215,5 mln. barelə, mazut və dizel yanacağı ehtiyatları isə 1,7 mln. barel artaraq 143,3 mln. barelə çatıb.
Bundan başqa neft bazarına Çin hökumətinin iqtisadiyyatın stimullaşdırılmasına dair tədbirlər paketi və strateji neft ehtiyatlarının artırılması barədə bəyanatları müsbət təsir edib.