Birja

Ana səhifə

Birja

Dow Jones indeksi 3,3%, S&P 500 3,5%, Nasdaq isə 2,8% enib

31 mart 2009 06:49 (UTC +04:00)

Bakı. Vahab Rzayev - APA-Economics. Martın 30-da Amerika fond bazarında Dow Jones indeksi 3,3% - 7522,02 bəndədək, S&P 500 3,5% - 787,53 bəndədək, Nasdaq isə 2,8% - 1501,80 bəndədək enib.
«APA-Economics»in məlumatına görə, ABŞ prezidenti yanında avtomobil sənayesi üzrə işçi qrupunun «General Motors» və «Chrysler» şirkətləri tərəfindən təklif edilən islahatlar planının qəbul edilməməsi barədə qərar ABŞ bazarında kotirovkaların enməsinə təsir edib. Beləliklə, hər iki şirkətin müflisləşməsi ehtimalı artıb. Bu amillər həm də maliyyə, İT və digər sahələrdə fəaliyyət göstərən şirkətlərin kotirovkalarını azaldıb. Nəticədə, «General Motors»un səhmləri 25%, «Citigroup»un səhmləri 11,8%, «Wells Fargo»nun səhmləri 14,2%, «Microsoft»un səhmləri 3,6%, «İntel»in səhmləri isə 4,5% ucuzlaşıb.
ABŞ-ın iki iri avtomobil şirkətinin bu vəziyyətə düşməsi Avropa bazarlarına da mənfi təsir göstərib. Belə ki, martın 30-da Britaniya FTSE 100 indeksi 3,5% - 3762,91 bəndədək, Fransa CAC-40-ı 4,3% - 2719,34 bəndədək, Almaniya DAX-ı isə 5,1% - 3989,23 bəndədək enib. Nəticədə, «Lloyds Banking Group»un səhmləri 15%, UBS-in səhmləri 11%, «Banco Santander»in səhmləri isə 6% ucuzlaşıb.
Dünya bazarında avronun dollara qarşı məzənnəsi 1,3223 (-0,13%) dollar təşkil edir.