Birja

Ana səhifə

Birja

Qızılın qiyməti üç aylıq minimuma enib

20 aprel 2009 12:56 (UTC +04:00)

Bakı. Vahab Rzayev – APA-Economics. Aprelin 17-də Nyu-Yorkun NYMEX əmtəə birjasında keçirilən ticarət əməliyyatlarının gedişində qızılın bir unsiyasının qiyməti 1,4% azalaraq 867,9 dollara düşüb ki, bu da yanvarın 22-də qeydə alınmış qiymətin təkrarıdır.
«APA-Economics»in məlumatına görə, artıq iki həftə davam edən qızılın ucuzlaşması əsasən iki ciddi amillə bağlıdır. İlk növbədə dünya maliyyə və iqtisadi böhran şəraitində investorlar qiymətli kağızlarda yerləşdirilən vəsaitlərini geri götürərək qızılın alınmasına yönəldirdilər ki, bu da investorların fikrincə həmin aktivlərin təhlükəsizliyi baxımından zəruri idi. Nəticədə, cari ilin əvvəlindən aprel ayına kimi qızılın bahalaşması müşahidə olunub. Son zamanlar isə fond bazarlarında müəyyən dərəcədə tarazlıq bərpa olunub ki, bu da investorların bazara qayıtması ilə nəticələnib. Beləliklə, satış üzrə təklif alış üzrə tələbatı üstələyib və qiymət tədricən azalıb.
Digər tərəfdən dolların avroya qarşı son zamanlar baş verən bahalaşması da qızılın ucuzlaşmasında öz əksini tapıb. Qeyd edək ki, dolların ucuzlaşması fond bazarlarında müşahidə olunan canlanmanın birbaşa nəticəsidir.
Bundan əlavə analitiklər qızılın qiymətinin düşməsini bazarda qızıl külçələrinə tələbatın azalması ilə də əlaqələndirirlər. Məsələn, dünyanın ən iri ixtisaslaşdırılmış investisiya fondu olan «SPDR Gold Trust» son bir ay ərzində fiziki (yəni, fyuçers kontraktları deyil, birbaşa külçələr) qızılın alışını azaldıb və nəticədə, fondun qızıl ehtiyatları 1 105,98 tona çatıb ki, bu da martın 17-dən sonra ən minimal göstəricidir.