Birja

Ana səhifə

Birja

AİF-in istiqrazlarının daha bir hissəsinin yerləşdirilməsi üzrə hərrac başlanır

05 oktyabr 2009 15:52 (UTC +04:00)

Bakı - APA-Economics. Oktyabrın 8-dən etibarən Bakı Fond Birjasında (BFB) «Azərbaycan İpoteka Fondu»-nun (AİF) faizli adlı sənədsiz təmin edilmiş istiqrazlarının yerləşdirilməsi üzrə növbəti hərrac başlanacaq.

BFB-dən APA-ya verilən məlumata görə, hərraca 5 000 000 AZN həcmində istiqraz çıxarılacaq. Emissiya prospektinə əsasən, yerləşdirmə kütləvi təklif üsulu ilə “Bakı Fond Birjası” QSC vasitəsilə keçiriləcək. İstiqrazlar cari qiymətlə (100,9500) satışa çıxarılacaqdır.

İstiqrazların ödənmə tarixi 10 may 2016-cı ildir. Təqdim edilmiş sifarişlər təklifdən çox olduğu halda sifarişlər proporsional qaydada təmin ediləcək. İstiqrazların ilkin yerləşdirilməsində iştirak edən təşkilat Azərbaycan Respublikası Mərkəzi Bankıdır.

AİF-in istiqrazların ilkin yerləşdirilməsinə 16 iyun 2009-cu il tarixində başlanılmışdır və bu günə kimi 33 000 000 AZN həcmində istiqraz hərraca çıxarılıb və tam həcmdə yerləşdirilib.

İstiqrazları əldə etmək istəyən şəxslər “Bakı Fond Birjası” QSC-nin üzvü olan və broker lisenziyasına malik olan təşkilata müraciət edə bilərlər.

AİF-in təmin edilmiş istiqrazlarının emissiya prospekti Bakı Fond Birjasının internet saytının (www.bfb.az) “Emitentlər” bölməsində yerləşdirilib.