Birja

Ana səhifə

Birja

Beynəlxalq Enerji Agentliyi neftə tələbatın artmayacağını proqnozlaşdırır

17 noyabr 2009 13:15 (UTC +04:00)

Bakı. Vahab Rzayev – APA-Economics. Beynəlxalq Enerji Agentliyi (BEA) inkişaf etmiş ölkələrdə neftə tələbatla bağlı ciddi artım müşahidə etmir. «APA-Economics»in məlumatına görə, bunu BEA-nın icraçı direktoru Nabuo Tanaka birdirib. Onun fikrincə, bu səbəbdən Neft İxracatçısı Ölkələri Təşkilatının (OPEC) növbəti sammitində neft hasilatı üzrə kvotanın artırılmasını gözləməyə dəyməz.

N.Tanaka vurğulayıb ki, İqtisadi Əməkdaşlıq və İnkişaf Təşkilatı (OECD) ölkələrində böyük həcmdə neft ehtiyatları yığılıb ki, bu da dünya iqtisadiyyatının bərpasının kiçik templərlə getdiyini göstərir. N.Tanakanın sözlərinə görə, yalnız Hindistan və Çin yüksək bərpa templəri nümayiş etdirir, Avropa və Yaponiyada isə yanacağa olan tələbat hələ də aşağı səviyyədədir.

Eyni zamanda, OPEC prezidenti Joze de Vaskonselos bəyan edib ki, hazırda neftin qiyməti «yaxşı səviyyədədir» və OPEC üzvləri nəzərdə tutulmuş hasilat kvotalarını yalnız 65% səviyyəsində icra edir.

Qeyd edək ki, OPEC-in növbəti sammiti bu ilin dekabrın 22-də keçiriləcək.