Birja

Ana səhifə

Birja

Dünya birjalarında böhran əlamətləri güclənməkdədir

05 avqust 2011 22:10 (UTC +04:00)

Bakı-APA. Avropanın qiymətli kağız birjalarında son günlər ərzində səhmlərin dəyərinin kəskin sürətdə düşməsi müşahidə olunur.
APA-nın bbc.com saytına istinadən verdiyi xəbərə görə, investorların narahatlığı avro zonasında səngiməyən borc böhranından və ABŞ iqtisadiyyatının zəifləməsindən qaynaqlanır.
Britaniyada əsas iqtisadi göstəricilərdən sayılan FTSE100 indeksi, Almaniyanın isə eyni əhəmiyyətə malik Dax indexi hərəsi 2.5% enib. Londonda bank səhmləri nəzərəçarpan dərəcədə ucuzlaşıb.
Beləki "Royal Bank of Scotland" Şotlandiya bankının səhmləri 8%, "Lloyds Banking Group" Loyds bankının səhmləri 3% ucuzlaşıb.
Təhlilçilər hadisələrin bu cür inkişafının investorlara mənfi təsir göstərəcəyini ehtimal edirlər.
Madriddə səhmlərin qiyməti qeyri sabit vəziyyətinə düşüb. Qeyri rəsmi məlumatlara görə Avropa Mərkəzi bankı İspaniya və İtaliya bondlarını
( dövlətin borc öhdəliklərini) almağa hazırlaşır.
Avropa Birliyi tərəfindən Yunanıstan, İrlandiya və Portuqaliya iqtisadiyyatlarına yardım göstərildikdən sonra, bu cür addımın İspaniya və İtaliya üçün də atılacağı proqnozlaşdırılır.
Avropada ən etibarlı sayılan Almaniya bonları ilə İtaliya və İspaniya borcları arasında uçurum yenidən rekord səviyyəyə çatıb.

Avro zonasında yaranmış gərgin maliyyə vəziyyətini müzakirə etmək üçün Almaniya kansleri Angela Merkel Fransa prezidenti Nikola Sarkozi ilə telefon danışıqları keçirmək niyyətindədir.

Avropa komissiyasının prezidenti Xose Manuel Barrozo (Jose Manuel Barroso) xəbərdarlıq edib ki, avro zonasında borc böhranının hüdudları daha da genişlənə bilər. Bu xəbərdarlıqdan sonra İtaliya və İspaniya ilə bağlı narahatlıq güclənib.

ABŞ-da büdcə və dövlət borcu ətrafında uzun çəkmiş siyasi debatlar və Amerikanın hazırkı iqtisadi durumu, bu ölkənin AAA borc reytinqindən məhrum olunacağı barədə narahatlığı gücləndirib.

Bu arada dünya birjalarında neftin qiymətinin kəskin düşməsi qeydə alınıb.

ABŞ birjalarında neftin qiyməti son həftə ərzində orta hesabla 10% aşağı düşüb.

Asiya bazarlarında Yaponiya və Honq Konqun əsas birja indeksləri 3-4% aşağı düşüb.

Amerikanın aparıcı Dow Jones indexi 4.3% enərək, 2008-ci ilin sonundan bəri ən aşağı səviyyəyə çatıb. Nasdaq texnoloji indeksi 5% enib.

ABŞ səhmlərinin son həftə ərzində ucuzlaşma dərəcəsi orta hesabla 6.4% təşkil edib.