Valyuta bazarında tələb-təklif nisbətindən asılı olaraq 2016-cı ildə manatın məzənnəsinin dinamikasında bir neçə möhkəmlənmə və ucuzlaşma dalğası müşahidə edilib. "APA-Economics" xəbər verir ki, bu barədə Azərbaycan Mərkəzi Bankının açıqladığı 2016-cı il üzrə Pul siyasəti icmalında deyilir.
Bildirilir ki, 2015-ci ilin sonuna ABŞ dollarının manata qarşı məzənnəsi 1,5594 manat səviyyəsində olubsa, 11.03.16 tarixində özünün dövr üzrə maksimum həddinə - 1,6456 manata qalxıb, 25.05.16 tarixində isə minimum həddinə - 1,4900 manata enib.
"İyun-avqust aylarında bahalaşan ABŞ dolları sentyabr ayında ucuzlaşmağa başlayıb, oktyabrın sonundan isə yenidən bahalaşma meylinə malik olub. 2016-cı ilin əvvəlindən manata nəzərən ABŞ dolları 13,6% bahalaşıb. Dövr üzrə 1 ABŞ dollarının manata qarşı orta günlük məzənnəsi isə 1,5965 manat təşkil edib", - deyə bankdan bildirilib.
Qeyd edilib ki, dövr ərzində ikitərəfli məzənnələrin dinamikası çoxtərəfli məzənnənin dinamikasına da təsir göstərib: "Hesabat ilində manatla yanaşı bir sıra digər ölkələrin, o cümlədən Azərbaycanın ticarət partnyoru olan ölkələrin milli valyutalarının ucuzlaşması davam edib. İl ərzində manatın qeyri-neft sektoru üzrə ümumi ticarət çəkili real effektiv məzənnəsi 19,8% ucuzlaşıb. Ucuzlaşma əsasən nominal effektiv məzənnənin 27,5% ucuzlaşması hesabına baş verib. Real effektiv məzənnənin ucuzlaşma meyli idxalın əvəzlənməsinə və ixracın stimullaşdırılmasına dəstək verən amildir".
Bizi Telegram-da izləyin
t.me/apa_az
Bizi Instagram-da izləyin
Bizi TikTok-da izləyin
Bizi Facebook-da izləyin
Bizi X-da izləyin
