Bakı – APA. Macarıstan parlamentində “Böyuk İpək Yolu” Beynəlxalq Gənclər İttifaqının sədri, Milli Məclisin deputatı Fuad Muradov, gənclər və idman nazirinin müavini İntiqam Babayev və Azərbaycanın Macarıstandakı səfiri Vilayət Quliyevlə Azərbaycan-Macarıstan parlamentlərarası dostluq qrupu arasında görüş keçirilib.
APA-nın xəbərinə görə, görüşdə dostluq qrupunun rəhbəri Gyöngyösi Marton və deputatlar Horvath Janos Heqedüs Tamas iştirak edib.
Azərbaycan-Macarıstan dostluq qrupunun rəhbəri Gyöngyösi Marton “Böyük İpək Yolu” BGT-nin Üzvlər Şurasının növbəti iclasının Budapeştdə keçirilməsindən məmnun olduğunu deyib və Azərbaycanla Macarıstanı təşkilatın iki əsas aparıcı qüvvəsi adlandırıb. Dostluq qrupunun üzvləri Macarıstan hökumətinin təşkilatın fəaliyyətinə tam dəstək verdiyini qeyd edərək, ümumilikdə Şərq ölkələri ilə əməkdaşlığın bütün sahələrdə vacib olduğunu qeyd edib.
“Böyük İpək Yolu” BGT-nin rəhbəri Fuad Muradov Macarıstan hökumətinin Azərbaycanla münasibətlərə önəm verdiyini qeyd edərək, ölkəmizin üzləşdiyi haqsızlıqlar, ərazi bütövlüyünün pozulması ilə bağlı problemdə rəsmi Budapeştin Bakıya dəstəyini xüsusi vurğulayıb. Deputat iki ölkə arasında əlaqələri çox yüksək qiymətləndirərək, mayın 9-da Şuşa və Gyongos şəhərlərinin “qardaşlaşmış şəhər” elan olunmasına diqqət çəkib. Milli Məclisin üzvü Azərbaycan üçün ağır bir gündə bu qərarın verilməsinə görə təşəkkür edib.
Macarıstan parlamentinin beynəlxalq əlaqələr komitəsinin üzvü, Janos Harvath Azərbaycan və Macarıstanı birləşdirən tarixi köklərdən danışıb. Macar deputat iki ölkə arasında münasibətlərin vacibliyini qeyd edərək, bu əlaqələrin möhkəmləndirilməsinin vacibliyini bildirib. Harvath qədim “İpək Yolu” kimi dərin tarixi köklərə malik ticarət və mədəniyyət əlaqələndiricisi olan konsepsiyanın XXI əsrdə gənclər tərəfindən yenidən gündəmə gətirilməsini yaxşı ideya kimi qiymətləndirib. Macar deputat bu prosesdə Azərbaycanın gördüyü işləri və göstərilən diqqəti yüksək qiymətləndirərək, Macarıstanın səmimi olaraq bu ideyaya dəstək verdiyini vurğulayıb.
Bizi Telegram-da izləyin
t.me/apa_az
Bizi Instagram-da izləyin
Bizi Facebook-da izləyin
Bizi Twitter-da izləyin
