Daxili siyasət

Ana səhifə

Daxili siyasət

ADP İdarə Heyətinin toplantısı keçirilib

09 iyul 2012 12:57 (UTC +04:00)

Bakı. Ramil Məmmədli - APA. Bu gün Azərbaycan Demokrat Partiyası (ADP) İdarə Heyətinin toplantısı keçirilib.

APA-nın məlumatına görə, toplantıda Dövlət Neft Şirkətinin xarici ölkələrə yatırımlar qoymasından narahatlıq bildirilib.

İdarə Heyəti Gürcüstan vətəndaşı olan soydaşlarımızın miqrasiya problemləri ilə üz-üzə qoyulması və onlara qarşı bürokratik əngəllərin yaradılması faktından da narahatlığı qeyd edib. Təşkilat hakimiyyəti soyadaşlarımızın Azərbaycan ərazisində sərbəst hərəkəti üçün normal qanuni şərait yaratmağa, bu sahədəki mövcüd problemləri aradan qaldırmağa çağırıb. İclasda sabiq prezident Ayaz Mütəllibovun vətənə qayıtmasına qoyulan məhdudiyyətlərin aradan qaldırılması təqdir edilib.

İdarə Heyəti son vaxtlar yol-nəqliyyat qəzalarının humanitar fəlakət həddinə yaxınlaşmasından da ciddi narahat olduğunu bildirib.

Yığıncaqda İranla Azərbaycan arasında gərginliyin davam etdiyi qeyd edilib, təşkilat hər iki ölkəni əməkdaşlıq prinsipinə hörmətlə yanaşmağa və vətəndaşlarının həbsi ilə nəticələnən sərt siyasətə son qoymağa çağırıb.

İdarə Heyəti üzvləri Fransanın yeni prezidenti Fransua Ollandın Nikola Sarkozinin xəttini davam etdirirək, “erməni genosidi”ni tanımaq barədə yeni paketlə çıxış etmək niyyətindən narahatlığını ifadə edib.