Daxili siyasət

Ana səhifə

Daxili siyasət

Strateji Araşdırmalar Mərkəzi ilin ilk yarısına dair hesabatını açıqlayıb

23 iyul 2012 07:48 (UTC +04:00)

SAM-dan APA-ya verilən məlumata görə, bu ilin ilk yarısında Strateji Araşdırmalar Mərkəzi tərəfindən bir neçə kitab layihələri üzərində iş yekunlaşıb. Azərbaycanda rus dilində "Azərbaycan müstəqillik yolunda (Analitik icmal)" adlı məqalələr toplusu və ABŞ-da ingilis dilində "Cənubi Qafqaz 2021: neft, demokratiya və geosiyasət" adlı kitab nəşr edilib. SAM-ın mətbu orqanları olan və Azərbaycan Respublikasının daxili və xarici siyasəti, beynəlxalq münasibətlərə dair "Strateji təhlil" jurnalının 4-cü sayı və ingilis dilində Türkiyədə nəşr edilən "Caucasus International" jurnalının növbəti sayı hesabat dövründə işıq üzü görüb.

2012-ci ilin yanvar-iyun aylarında SAM tərəfindən Azərbaycanda və xaricdə 18 müxtəlif tədbir təşkil edilib.

Mərkəz Azərbaycanda 3 kitab təqdimatı, 3 dəyirmi masa, 3 beynəlxalq konfrans olmaqla ümumilikdə 13 tədbir keçirib. Mart ayında SAM-ın təşkilatçılığı ilə 100-ə yaxın xarici qonağın iştirakı ilə keçirilmiş Islam Əməkdaşlıq Təşkilatına üzv dövlətlərin Beyin Mərkəzlərinin III Forumu da keçirilib.

2012-ci ilin yanvar-iyun aylarında SAM-ın öz tərəfdaşları ilə birgə xaricdə beş beynəlxalq tədbir təşkil etmişdir. Onların arsında ABŞ-da təşkil edilmiş iki konfransı (Kolumbiya Universitetində və Sent Luizdə yerləşən Vaşinqton Universitetində), Fransa Beynəlxalq Münasibətlər İnstitutu və TEAS ilə birgə ”Azərbaycanın Avropanın enerji təhlükəsizliyi strategiyasında rolu” mövzusunda Parisdə təşkil edilmiş beynəlxalq konfransı, Ukrayna Prezidenti yanında Milli Strateji Tədqiqatlar İnstitutunun və Azərbaycan Respublikasının Ukraynadakı səfirliyinin təşkilatçılığı ilə ”Avropa və qlobal enerji təhlükəsizliyi kontekstində Qara dəniz və Xəzər regionunun rolu” mövzusunda Kiyevdə keçirilmiş dəyirmi masanı və eləcə də Moldova Respublikasının İctimai İdarəçilik Akademiyasının, Moldova Respublikası İctimai Siyasət İnstitutunun və Azərbaycan Respublikasının Moldovadakı səfirliyinin birgə səyləri nəticəsində ”Ermənistan-Azərbaycan, Dağlıq Qarabağ münaqişəsi və Dnestryanı münaqişə: müasir vəziyyət və nizamlama perspektivləri” mövzusunda Kişinyovda keçirilmiş beynəlxalq konfransı misal gətirmək olar.

2012-ci ilin ilk 6 ayı ərzində həyata keçirilən bir neçə elmi-tədqiqat layihəsi başa çatdırılıb. Onların arasında “Azərbaycanda orta sinif: sosial-iqtisadi və siyasi aspektlər” və "Azərbaycanda siyasi partiya və hərəkatlarda gənclərin ictimai-siyasi fəallığı və təşkilatlanma səviyyəsi" mövzularında keçirilmiş sosioloji sorğular qeyd edilməlidir.

2012-ci ilin ilk altı ayı ərzində SAM əməkdaşları tərəfindən 55 qapalı xarakter daşıyan arayış və eləcə də hesabatlar hazırlanıb, xarici ölkələrin və Azərbaycanın elmi jurnallarında, mətbuatında və elektron mediasında 127 məqalə çap edilib və 10 müsahibə verilib.

Hesabatda qeyd olunur ki, bu dövrdə beynəlxalq əməkdaşlıq çərçivəsində 9 beyin mərkəzi ilə memorandum və sazişlər imzalanıb. Bu mərkəzlər arasında Stratfor (ABŞ), Qazaxıstan Respublikasının Prezidenti yanında Strateji Araşdırmalar İnstitutu, Tacikistan Respublikasının Prezidenti yanında Strateji Tədqiqatlar Mərkəzi, İslamabad Siyasi Araşdırmalar İnstitutu (Pakistan), Strateji Araşdırmalar üzrə Milli İnstitut (Qirğızıstan), Helsinki Universitetinin Aleksanteri İnstitutu, Fransanın Beynəlxalq Münasibətlər İnstitutu, Ukrayna Prezidenti yanında Milli Strateji Tədqiqatlar İnstitutu, Gürcüstan Strateji və Beynəlxalq Araşdırmalar Fondu var.