Daxili siyasət

Ana səhifə

Daxili siyasət

Helsinki Vətəndaş Assambleyasının Azərbaycan və Ermənistan milli komitələri birgə tədbir keçirəcək

06 avqust 2012 13:01 (UTC +04:00)

Bakı. Ramil Məmmədli-APA. Helsinki Vətəndaş Assambleyasının Azərbaycan və Ermənistan milli komitələrinin təşəbbüsü ilə erməni və azərbaycanlı jurnalistlərin iştirakı ilə tədbir keçiriləcək.

Bu məlumatı APA-ya Helsinki Vətəndaş Assambleyasının Azərbaycan Milli Komitəsinin sədri Arzu Abdullayeva verib. A. Abdullayeva layihənin rəhbərlərinin Azərbaycandan politoloq Zərdüşt Əlizadə, Ermənistandan isə Helsinki Vətəndaş Assambleyasının Ermənistan Milli Komitəsinin sədri Georgi Vanyan olduğunu da qeyd edib: “Tədbir treninq formatında keçiriləcək. Hər iki tərəfdən 5 jurnalist iştirak edəcək. Treninqin təlimçiləri də erməni və azərbaycanlı ekspertlərdən təşkil ediləcək”. A. Abdullayeva bildirib ki, tədbirin avqustun sonunda Gürcüstanda keçirilməsi nəzərdə tutulub.

O, erməni və azərbaycanlı jurnalsitlərin iştirakı ilə yaxın vaxtlarda daha bir tədbirin keçiriləcəyini də diqqətə çatdırıb: “Free Press Unlimited təşkilatının təşəbbüsü ilə Azərbaycan və Ermənistandan olan fotoreportyorlar üçün də treninq keçiriləcək. Bu tədbir sentyabrın 15-də Gürcüstanın paytaxtı Tiflisdə baş tutacaq”. O, treninqin təlimçilərinin Hollandiyadan olan media-ekspertlər olacağını da söyləyib: “Azərbaycandan Bakı Jurnalistika Məktəbi, Ermənsistandan isə Helsinki Vətəndaş Assambleyasının Ermənistan Milli Komitəsi bu layihənin tərəfdaşları olacaqlar”.