Daxili siyasət

Daxili siyasət

Abel Məhərrəmov: “Murtuz Ələsgərovun adının əbədiləşdirilməsi məqsədilə müvafiq qərar qəbul olunub”

08 avqust 2012 13:18 (UTC +04:00)

Bu açıqlamanı APA-ya Bakı Dövlət Universitetinin (BDU) rektoru Abel Məhərrəmov verib.

M. Ələsgərovun vəfatı ilə Azərbaycan elminə, təhsilinə, xüsusilə də Bakı Dövlət Universitetinə ağır itki üz verdiyini deyən A. Məhərrəmov onun bütün həyatını Azərbaycan elminə və təhsilinə həsr etdiyini söyləyib: “1950-ci ildə universiteti fərqlənmə diplomu ilə bitirən Murtuz Ələsgərov göndərişlə SSRİ Elmlər Akademiyasının Hüquq İnstitutunun aspiranturasına daxil olub. Üç ildən sonra beynəlxalq hüquq üzrə alimlik dərəcəsi alıb. Murtuz Ələsgərov Azərbaycanda ilk hüquqşünas alimdir ki, beynəlxalq hüquq istiqamətində elmlər namiəzdi olub. İndi bu məsələ asan görünür. O zaman onun üzərinə böyük yük düşürdü. Düşünürdülər ki, gənc alim Azərbaycanda bu istiqamət üzrə elmi məktəb yarada biləcəkmi?”

A. Məhərrəmov mərhum alimin fəaliyyəti nəticəsində Azərbaycan dilində tədris vəsaitlərinin hazırlandığını, elmi monoqrafiyaların yazıldığını, onun rəhbərliyi etdiyi sahədə 40-a qədər elmlər namizədi və doktorun yetişdiyini də deyib: “Buna xüsusi dəyər veririk. Artıq bu gün beynəlxalq hüquq sahəsində 150-yə yaxın elmlər namizədi və doktoru var. 1953-cü ildə beynəlxalq hüquq üzrə elmlər namizədi olan yeganə şəxs Murtuz Ələsgərov idi. O öz vəzifəsini yerinə yetirdi və böyük elmi məktəb yaratdı”. A. Məhərrəmov M. Ələsgərovun ölkənin ağır illərində BDU-nun rektoru vəzifəsində çalışdığını və missiyanı uğurla yerinə yetirdiyini söyləyib.

Rektor qeyd edib ki, M. Ələsgərovun adının əbədiləşdirilməsi məqsədilə müvafiq qərar qəbul olunub: “Alimin 85 illiyi münasibətilə beynəlxalq konfrans keçiriləcək. M. Ələsgərov adına təqaüd təsis olunacaq. Sistematik olaraq, alimin doğum günləri ərəfəsində beynəlxalq elmi konfranslar keçiriləcək”.