Daxili siyasət

Daxili siyasət

Sərdar Cəlaloğlu: “Səkkiz partiya rəhbəri ilə görüşümüzdə məqsəd prezident seçkiləri ilə bağlı seçki koalisiyası yaratmaqdır”

10 avqust 2012 11:28 (UTC +04:00)

“İftar süfrəsinə toplaşan partiya sədrləri müxalifətin durumunu və bundan çıxış yollarını müzakirə etdik”

Bakı. Ramil Məmmədli-APA. “Müxalifətdə təmsil olunan səkkiz partiya rəhbərinin iştirakı ilə keçirilən yığıncağı yeni birliyin başlanğıcı kimi görmək istəyirəm. Müzakirələrdə bu istiqamətli söhbət olub. Bu görüşün səkkizlik formatında olub-olmayacağını isə gələcək göstərəcək. Hər halda müxalifətin birliyinin yaradılması günün bir nömrəli məsələsidir”.

Bu açıqlamanı APA-ya Azərbaycan Demokrat Partiyasının (ADP) sədri Sərdar Cəlaloğlu verib. ADP sədri deyib ki, bir neçə gün öncə iftar süfrəsinə toplaşan partiya sədrləri müxalifətin durumunu və bundan çıxış yollarını müzakirə ediblər: “Bu toplantıda iştirak edən partiyaların bütün müxalifəti əhatə etdiyini iddia etmirəm və müxalifət adı uğrunda savaş açmaq niyyətim də yoxdur. Ancaq qəbul etməliyik ki, bu partiyalar təşkilatlanmış, xalq tərəfindən tanınan və uzun illər təcrübəsi olan partiyalardır”.

S. Cəlaloğlu qeyd edib ki, həmin görüşə Müsavat, Xalq Cəbhəsi, Milli İstiqlal, Ümid, Demokrat, Klassik Xalq Cəbhəsi, Liberal, Vətəndaş və İnkişaf partiyalarının sədrləri qatılıb: “Onların iştirakı ilə əməkdaşlığın formalaşdırılması adıçəkilən partiyaların yaratdıqları birliklərin fəaliyyətini arxa plana ata bilməyəcək. Bu yığıncaqda niyyət prezident seçkiləri ilə bağlı seçki koalisiyasının yaradılmasıdır. Seçki koalisiyası ancaq seçki dövrü üçün nəzərdə tutulub. Sağlam məntiq qalib gələrsə, koalisiyanın yaradılmasına nail olmaq mümkün olunacaq. Bəzən isə liderlər düzgün qərar verməyə çətinlik çəkirlər. Subyektiv amillər buna mane ola bilər. Şərtlər, xalqın və beynəlxalq təşkilatların gözləntisi də bu koalisiyanın yaradılmasını diktə edir. Kimlərsə hansısa məqsədlə bunu istəməyəcəksə, bu başqa məsələdir. Bu birliyin yaradılmasının əleyhinə səsləndirilə biləcək elə bir arqument yoxdur”.

Qeyd edək ki, Azərbaycan Demokratik Partiyasının sədri Sərdar Cəlaloğlu ötən gün səkkiz siyasi partiya sədrini iftar süfrəsinə dəvət edib. Restoranların birində baş tutan iftar süfrəsinə KXCP sədri Mirmahmud Mirəlioğlu, Müsavat başqanı İsa Qəmbər, Ümid Partiyasının sədri İqbal Ağazadə, AMİP sədri Yusif Bağırzadə, AXCP sədri Əli Kərimli, Azərbaycan Liberal Partiyasının sədri Əvəz Temirxan, Vətəndaş və İnkişaf Partiyasının sədri Əli Əliyev qatılıb.