Daxili siyasət

Daxili siyasət

Əli Əliyev: “Partiya rəhbərləri ilə görüşdə müxalifətin siyasi və fəaliyyət perspektivi ilə bağlı bir neçə inkişaf ssenarisi nəzərdən keçirildi”

10 avqust 2012 13:33 (UTC +04:00)

“İrəli sürülən təkliflər arasında seçki koalisiyasının yaradılması təşəbbüsü də vardı”

Bakı. Ramil Məmmədli-APA. “İftar məclisində irəli sürülən təkliflər arasında seçki koalisiyasının yaradılması təşəbbüsü də vardı. Bunu görüşdə iştirak edən tərəflərin əksəriyyətinin mövqeyi kimi də qiymətləndirmək mümkündür”.

Bu açıqlamanı APA-ya Vətəndaş və İnkişaf Partiyasının (VİP) sədri Əli Əliyev verib. VİP sədrinin sözlərinə görə, iftar süfrəsində bir sıra siyasi məsələlər müzakirə edilib. Müzakirə edilən məsələlər arasında müxalifətin prezident seçkilərində siyasi kursu da olub: “Məclisdə iştirak edən partiya sədrləri qarşıdan gələn dövrə müxtəlif nəzərlərdən münasibətlərini ifadə ediblər. Müxtəlif mövqelər olub və bunları açıqlamaq istəmirəm. Çünki bu etik baxımdan da düzgün deyil”.

Ə. Əliyev deyib ki, görüşdə müxalifətin siyasi və fəaliyyət perspektivi ilə bağlı bir neçə hadisənin inkişaf ssenarisi nəzərdən keçirilib: “Ancaq hansısa mövqe ətrafında ümumi konsensus əldə edilməyib”.

Qeyd edək ki, Azərbaycan Demokratik Partiyasının sədri Sərdar Cəlaloğlu ötən gün səkkiz siyasi partiya sədrini iftar süfrəsinə dəvət edib. Restoranların birində baş tutan iftar süfrəsinə KXCP sədri Mirmahmud Mirəlioğlu, Müsavat başqanı İsa Qəmbər, Ümid Partiyasının sədri İqbal Ağazadə, AMİP sədri Yusif Bağırzadə, AXCP sədri Əli Kərimli, Azərbaycan Liberal Partiyasının sədri Əvəz Temirxan, Vətəndaş və İnkişaf Partiyasının sədri Əli Əliyev qatılıb.