Daxili siyasət

Daxili siyasət

Milli Məclisin yaz, payız və növbədənkənar sessiyalarının iclaslarında deputatların iştirak aktivliyi məlum olub

13 avqust 2012 13:57 (UTC +04:00)

APA-nın məlumatına görə, Dördüncü Çağırış MM-in ilk iclasında 122 deputat iştirak edib. Azərbaycan prezidenti İlham Əliyevin də qatıldığı iclas Dördüncü Çağırış MM-in sessiya iclasları arasında deputatların aktivliyinə görə öndədir. Maraqlısı bundadır ki, həmin gün (29 noyabr 2010-cu il) 115 nəfər deputat iclasa qatıldığını təsdiqləyib. İclas zamanı bu, yeni deputatların səsvermə qaydalarına hələ uyğunlaşmamaları ilə izah edilib. Özü də bu izahat rəsmi kürsüdən olub.

Həmin sessiyanın 30 dekabr 2010-cu il tarixdə keçirilən iclasında isə 110 deputat iştirak edib. Belə ki, həmin iclas sessiya müddətində deputatların ən passiv iştirakı ilə yadda qalıb.

Dördüncü Çağırış Milli Məclisin ikinci sessiyasının iclasları arasında ən çox deputat 15 mart 2011-ci ildə keçirilən iclasa (116 deputat), ən az deputat isə 15 aprel 2011-ci il ildə keçirilən iclasa (97 deputat) qatılıb. Maraqlıdır ki, 2011-ci il martın 15-də hökumətin (Nazirlər Kabinetinin), aprelin 15-də isə iclasında Hesablama Palatasının hesabatı dinlənilib.

Dördüncü Çağırış Milli Məclisin növbədənkənar üçüncü sessiyası zamanı cəmi iki iclas keçirilib. Onlardan birində 96, digərində 100 deputat iştirak edib.

Növbəti – dördüncü sessiyanın 6 və 23 dekabr 2011-ci il tarixdə keçirilən iclaslarının hər birinə 114 deputat qatılıb. Sessiya müddətində ən yüksək aktivlik nümayiş etdirilən bu iclaslardan birində (6 dekabr) Azərbaycan Respublikasının 2012-ci il dövlət büdcəsi haqqında qanun layihəsi müzakirə olunub. Sessiyanın 24 noyabr 2011-ci il tarixdə keçirilən iclasına isə cəmi 97 deputat qatılıb.

Dördüncü Çağırış Milli Məclisin beşinci sessiyasının fevralın 1-də və 14-də, martın 16-da və mayın 22-də keçirilən iclasına daha çox deputat qatılıb: 114 deputat. Yaz sessiyasının ən az deputat iştirak edən iclası martın 30-da keçirilib: 92 deputat. Bu, həm də Dördüncü Çağırış Milli Məclisin sessiya iclasları arasında deputatların ən passiv olduğu iclas sayılır.

MM-in növbədənkənar altıncı sessiyasının iki iclası keçirilib ki, bu iclaslardan birində 111, digərində 105 deputat iştirak edib.

Qeyd edək ki, MM üzvlərinin sayı 125 nəfərdir. MM-in sessiya iclaslarında yetərsayın olması üçün 83 deputatın iştirakı kifayətdir.