Daxili siyasət

Daxili siyasət

YAP: Mövcud seçki qanunvericiliyi Azərbaycanda ədalətli, şəffaf və hüquqa söykənən seçkilər keçirmək üçün əlverişlidir

23 avqust 2012 09:28 (UTC +04:00)

Bakı. Ramil Məmmədli - APA. “Yeni Azərbaycan Partiyası dəfələrlə bəyan edib ki, mövcud seçki qanunvericiliyi Azərbaycanda ədalətli, şəffaf və hüquqa söykənən seçkilər keçirmək üçün əlverişlidir və bu qanunvericilik bazası indiyə qədər keçirilmiş seçkilərdə özünü doğruldub”. APA-nın məlumatına görə, bunu partiyanın saytına müsahibəsində YAP İcra katibinin müavini, Milli Məclisin deputatı Mübariz Qurbanlı deyib.

M. Qurbanlı bildirib ki, mövcud Seçki Məcəlləsi hazırlanarkən beynəlxalq qurumların, ATƏT-in və Avropa Şurasının müvafiq tövsiyələri nəzərə alınıb: “Bu məcəllə əslində, bütün siyasi partiyaların maraqlarını ifadə edən sənəddir. Məcəlləyə uyğun olaraq bütün siyasi partiyalar qanun çərçivəsində seçki prosesində iştirak edə bilər”.

O qeyd edib ki, seçki komissiyaları tam müstəqildir və onlar heç bir siyasi qüvvədən asılı vəziyyətdə deyil: “Komissiyalar paritet əsaslarla parlamentdə çoxluq və azlığı təmsil edən partiyaların, eləcə də bitərəflərin nümayəndələrindən təşkil olunur. Eləcə də, dövlət normal seçkilərin keçirilməsi üçün bütün şəraiti yaradıb. Əlbəttə ki, vaxtaşırı olaraq seçki qanunvericiliyinə müvafiq dəyişiklər edilir və gələcəkdə də bu qanunvericiliyin təkmilləşdirilməsi yönündə müəyyən addımlar atıla bilər. Amma bütövlükdə Seçki Məcəlləsi beynəlxalq standartlara uyğundur və sənədi köklü surətdə dəyişməyə ehtiyac yoxdur”. Onun sözlərinə görə, bu qanunvericilik əsasında gələn il də azad, ədalətli və demokratik seçkilər keçirməyə nail olunacaq: “Odur ki, müxalifəti təmsil edən siyasi partiyaların, təşkilatların seçki qanunvericiliyi ilə əlaqədar iradları və iddiaları əslində həmin təşkilatların növbəti seçkilərdə uğursuqlarını indidən sığortalamaq məqsədi daşıyan təbliğat xarakterli addımlardır”.