Daxili siyasət

Ana səhifə

Daxili siyasət

Azərbaycan prezidenti Şəkidə bir neçə obyektin və məcburi köçkünlər üçün salınmış qəsəbənin açılışında iştirak edib

09 sentyabr 2012 18:18 (UTC +04:00)

APA-nın xəbərinə görə, prezident Şəkidə Heydər Əliyev Mərkəzinin təməlqoyma mərasimində iştirak edib.

Dövlət başçısına məlumat verilib ki, ərazidə Heydər Əliyev Parkı, Bayraq Meydanı və Şəki Şəhər İcra Hakimiyyəti üçün yeni bina da inşa olunacaq.

Prezident İlham Əliyev Heydər Əliyev Mərkəzinin təməlini qoyub.
Daha sonra prezident Şəkidə taxıl anbarı və dəyirman kompleksinin açılışında iştirak edib.

Sahibkarlığa Kömək Milli Fondunun icraçı direktoru Şirzad Abdullayev məlumat verib ki, regionların 2009-2013-cü illərdə sosial-iqtisadi inkişafı Dövlət Proqramına uyğun olaraq, Şəkinin Göybulaq kəndində üç hektar ərazidə taxıl məhsullarının tədarükü, saxlanması və emalı kompleksi inşa edilib. Kompleksin ümumi layihə dəyəri 4,5 milyon manatdır. Bu layihənin icrasına İqtisadi İnkişaf Nazirliyinin Sahibkarlığa Kömək Milli Fondu tərəfindən 700 min manat güzəştli kredit verilib. Layihənin icrasına 2010-cu ilin sonunda başlanılıb, 2012-ci ilin avqustunda başa çatdırılıb.
Daha sonra ölkə başçısı dördulduzlu “Shaki Palace” otelinin açılışında iştirak edib. Otelinin tikintisinə 2007-ci ilin mayında başlanıb. Otel kompleksinin eyni vaxtda 100 nəfərə xidmət göstərməsi nəzərdə tutulub.

Bu gün prezident Şəkidə Mirzə Fətəli Axundzadə adına mədəniyyət və istirahət parkında aparılmış yenidənqurma işləri ilə tanış olub. Prezident M.F.Axundzadənin parkda ucaldılmış abidəsinin önünə gül dəstəsi qoyub.

Ölkə başçısı Şəkidə 423 məcburi köçkün ailəsi üçün salınmış yeni qəsəbənin açılışında iştirak edib. Prezident məcburi köçkün ailələrindən birinin evində olub, qəsəbədə açılmış Ağdam 29 nömrəli köçkün tam orta məktəbinə də baş çəkib.

Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov deyib ki, qəsəbədə 50 yerlik uşaq bağçası, klub-icma mərkəzi, inzibati bina, ambulatoriya və poçt binaları da inşa edilib. Yeni qəsəbəyə Şəki rayonundakı fin tipli qəsəbədə məskunlaşan 372 ailə və ya 1551 nəfər, o cümlədən məktəb binasında yerləşən 51 ailə və ya 209 nəfər, ümumilikdə 423 ailə və ya 1760 nəfər köçürüləcək.
Məcburi köçkün ailələrindən 149-u Ağdamdan, 168-i Laçından, 53-ü Kəlbəcərdən, 44-ü Şuşadan, 9-u isə Xocalıdandır.

Yeni qəsəbə Dövlət Neft Fondundan ayrılan 33 milyon 227 min manat vəsait hesabına Məcburi Köçkünlərin Sosial İnkişaf Fondu tərəfindən tikilib. Qəsəbənin elektrik, su və qaz təchizatı şəbəkələri Şəki rayonunun kommunikasiya sisteminə qoşulub.