Daxili siyasət

Ana səhifə

Daxili siyasət

Sərdar Cəlaloğlu: “Səkkiz partiyanın razılaşma əldə etməsinə Müsavat Partiyası mane oldu”

17 sentyabr 2012 15:09 (UTC +04:00)

Bu açıqlamanı APA-ya Azərbaycan Demokrat Partiyasının (ADP) sədri Sərdar Cəlaloğlu verib.

S. Cəlaloğlu bildirib ki, hələ də müxalifətin müəyyən hissəsi üçün birliyin əhəmiyyəti aydın deyil: “Ən əsas problem budur. Mən öz tərəfimdən bacardığım qədər addım atdım. Bu prosesi davam etdirirəm. Bir adamın eyni işi davam etdirməsi ictimaiyyət tərəfindən yaxşı qiymətləndirilmir. Ancaq başqa heç kimin belə cəhd etdiyini də görmürəm. Bu prosesə müsbət reaksiya göstərməyən təşkilatlar isə AXCP və Müsavat Partiyasıdır. Müsavat Partiyası birmənalı şəkildə buna etiraz edir. AXCP isə müttəfiq kimi Müsavat Partiyasının mövqeyini əsas götürərək, həmin təşəbbüsdən imtina edir. Müsavat Partiyası iddia edir ki, bəzi partiyalar təmiz müxalifət deyillər. Rəsmi şəkildə isə deyirlər ki, onlar üçün əməkdaşlıq modeli yalnız İctimai Palatadır”.

S. Cəlaloğlu qeyd edib ki, proses bu cür forma aldığına görə hələlik təşəbbüsü davam etdirmək niyyətində deyil.

Müsavat Partiyası başqanının müavini Gülağa Aslanlı isə S. Cəlaloğlunun mövqeyi ilə razılaşmadığını deyib: “Əgər söhbət müxalifətin daha geniş formatda inteqrasiyasından gedirsə, İctimai Palata digərləri ilə müqayisədə daha çox ictimai-siyasi qurumu özündə birləşdirir. Biz həmişə Azərbaycanda dəyişiklik istəyən qüvvələri İctimai Palataya dəvət etmişik. Kiminsə bu quruma gəlməsinə də məhdudiyyət qoyulmayıb. İctimai Palatanın hansısa addımları tənqid oluna bilər. Lakin bu qurumun heç bir iş görmədiyi haqda fikirlər səsləndirməməlidir”.

Qeyd edək ki, Azərbaycan Demokratik Partiyasının sədri Sərdar Cəlaloğlu ötən ay səkkiz siyasi partiya sədrini iftar süfrəsinə dəvət edib. Restoranların birində baş tutan iftar süfrəsinə KXCP sədri Mirmahmud Mirəlioğlu, Müsavat başqanı İsa Qəmbər, Ümid Partiyasının sədri İqbal Ağazadə, AMİP sədri Yusif Bağırzadə, AXCP sədri Əli Kərimli, Azərbaycan Liberal Partiyasının sədri Əvəz Temirxan, Vətəndaş və İnkişaf Partiyasının sədri Əli Əliyev qatılıb. Süfrə arxasında bu partiyaların iştirakı ilə yeni siyasi ittifaqın yaradılması məsələsi müzakirə edilib və ilkin razılaşma əldə olunub.