Daxili siyasət

Ana səhifə

Daxili siyasət

KXCP sədrinin müavini: “Məqsədimiz partiyanı müxalifət düşərgəsinə qaytarmaqdır”

24 sentyabr 2012 08:42 (UTC +04:00)

Son 10 ildir partiya eyni formada idarə olunur. Dəfələrlə müxalifətin inteqrasiyasına yönələn birliklərdə təmsilçiliyimizlə bağlı qərarı olub, lakin hər dəfə bu qərarlar icraya yönəlməyib. Partiyanın rəhbəri ya prosesin icra edilməsinə imkan verməyib, ya da öz bildiyi kimi addım atıb. Belə hallar çox olub. Lakin ictimaiyyətə indi açıqlanır”.

Bunu APA-ya açıqlamasında KXCP sədrinin müavini, “Demokratik Birlik” fraksiyasının həmtəsisçisi Fikrət Cəfərov deyib. O bildirib ki, partiyada təsis olunan fraksiyanın qarşısında duran əsas vəzifə təşkilatı təmsil olunduğu düşərgədəki fəaliyyətinə geri qaytarmaq, pərdəarxası məsələləri açıqlamaq olacaq: “Partiyanın hökumətdə olan hansısa oliqarxın maraq dairəsindən çıxarmalıyıq. Kimsə KXCP-nin möhürü ilə oynaya bilər, amma partiya hansısa şəxsin nəzarəti altında bu rejimlə pərdəarxası bir yerdə ola bilməz. Fraksiya bu məsələlərlə bağlı ciddi fəaliyyət göstərəcək, biz KXCP-nin müxalifət düşərgəsinə qaytarılması istiqamətində mübarizə aparacağıq”.

F. Cəfərovun sözlərinə görə, ictimaiyyətdə KXCP-nin dumanlı imici yaranıb. Buna səbəb KXCP-nin mənsub olduğu düşərgədən sapmalarıdır: “Partiyanın sətiraltı proseslərdə iştirakı şübhələr yaradır. Partiya mütləq öz siyasi düşərgəsinə dönməlidir. Biz ictimai fikirdə dumanlı imici dağıdacağıq və sübut edəcəyik ki, KXCP öz yolundadır. Artıq rayon şöbələrindən də fraksiyaya qoşulmaq niyyətləri açıqlanıb. Partiyanın üzvlərindən digər şəxslərin də fraksiyaya qoşulmasında heç bir problem yoxdur. Tələblərimizdə isə əlahiddə bir məqam yoxdur”.

O qeyd edib ki, indiyə kimi 4 dəfə partiyada kütləvi narazılıq yaranıb və hər dəfə də KXCP rəhbərliyində dəyişiklik baş tutub: “Fraksiyanın yaradılması partiyanın dağılmasına yönəlməyib, əksinə onun möhkəmlənməsinə və inkişafına stimul verəcək. Partiyanın bazasında yeni partiyanın yaradılmasından da söhbət getmir. Fraksiyanın fəaliyyətində əsas istiqamətlərdən biri də ümummüxalifət miqyasında inteqrasiya təşəbbüsü ilə çıxış etməkdir. Artıq korporativ oyunlar sona yetməlidir. Çünki bu vəziyyət müxalifəti getdiksə cılızlaşdırır”.

Qeyd edək ki, “Demokratik Birlik” fraksiyası KXCP sədrinin strateji məsələlər üzrə müavini Aydın Mədətoğlu, seçki məsələləri üzrə müavin Ədalət Yusubov, əlaqələr üzrə müavin Fikrət Cəfərov, beynəlxalq məsələlər üzrə müavin Qaya Əliyev, gənclər üzrə müavin Rüfət Sahiboğlu, partiyanın İdarə Heyətinin üzvü Rafiq Abdulla tərəfindən təsis edilib.

KXCP