Daxili siyasət

Ana səhifə

Daxili siyasət

Baş Prokurorluqda prokurorluq işçilərinin peşə bayramına həsr olunmuş mərasim keçirilib

01 oktyabr 2012 17:04 (UTC +04:00)

Bakı-APA. Bu gün Baş Prokurorluqda “1 Oktyabr – Azərbaycan Respublikası Prokurorluğu işçilərinin peşə bayramı günü” və Milli Prokurorluğun yaradılmasının 94-cü ildönümünə həsr olunmuş mərasim keçirilib. Baş Prokurorluğun mətbuat xidmətindən APA-ya verilən məlumata görə, mərasimi açıq elan edən baş prokuror Zakir Qaralov peşə bayramı günü münasibətilə Baş Prokurorluğun rəhbərliyi və Kollegiyası adından prokurorluq orqanlarında çalışan bütün əməkdaşları, təqaüddə olan ağsaqqal və ağbirçək veteranları, onların ailə üzvlərini səmimi qəlbdən təbrik edib. O bildirib ki, Azərbaycan Prokurorluğunun demokratik məzmunda tamamilə yenidən formalaşması, müstəqil dövlətçiliyimizin maraqlarına xidmət edən bir təsisat kimi ən mütərəqqi standartlara uyğun şəkildə təkmilləşməsi və müasirləşməsi məhz Heydər Əliyevin həyata keçirdiyi siyasət tədbirləri və qayğısı nəticəsində mümkün olub.

Dövlət başçısı cənab İlham Əliyevin 01 oktyabr 2012-ci il tarixli Sərəncamları ilə prokurorluq əməkdaşlarından 5-i ali xüsusi rütbələrə və 22-si «İgidliyə görə» və «Dövlət qulluğunda fərqlənməyə görə» medalları qismində dövlət təltiflərinə layiq görülməsi bütövlükdə prokurorluğun kollektivinin əməyinə verilən yüksək qiymət kimi dəyərləndirilib və bu münasibətin səylərimizin işin həmin etimada layiq səviyyədə qurulmasına səfərbər edildiyi vurğulanıb.

Baş prokurorun giriş nitqində və mərasimdə məruzə ilə çıxış edən Baş prokurorun birinci müavini Rüstəm Usubovun çıxışında diqqətə çatdırılıb ki, Azərbaycanın məhvolma təhlükəsi ilə üzləşdiyi, müstəqilliyinin yenidən itirilməsi və vətəndaş müharibəsinin başlanması qorxusu ilə qarşılaşdığı bir dövrdə xalqının təkidli tələbi ilə siyasi hakimiyyətə qayıdan Heydər Əliyevin 1993-cü ilin ikinci yarısından başlayaraq həyata keçirdiyi müdrik dövlətçilik siyasətinin nəticəsi olaraq, bütün digər qurumlarla yanaşı Azərbaycan Prokurorluğu da qanun əsasında fəaliyyət göstərən və millətinə xidmət edən demokratik məzmunlu dövlət təsisatı kimi tamamilə yenidən yaradılmaqla dövlətçiliyimizin əsas sütunlarından hesab edilən bir təşkilata çevrilmiş, onun dövlətçiliyə sadiq kadr korpusu formalaşdırılmışdır. Azərbaycan Respublikasında həyata keçirilən mütərəqqi məhkəmə-hüquq islahatları çərçivəsində milli prokurorluq orqanları müasir məzmunda yeniləşdirilməklə, cəmiyyətdə statusuna uyğun yerini tutub.

Xidmətdə fərqləndiklərinə görə mükafatlandırılmış prokurorluq əməkdaşlarına Baş prokuror Zakir Qaralov tərəfindən «Prokurorluğun fəxri işçisi» döş nişanı, Fəxri fərmanlar, qiymətli hədiyyələr və rütbə dərəcələri təqdim edilib.
Mərasimin yekununda Azərbaycan Prokurorluğunun kollektivi adından dövlət başçısı cənab İlham Əliyevin ünvanına yekdilliklə müraciət qəbul edilib.