Daxili siyasət

Ana səhifə

Daxili siyasət

İqbal Ağazadə: ”Əsas müxalifət partiyaları vahid komandanı qəbul etsələr, biz də iddialarımızdan geri durmağa hazırıq”

06 oktyabr 2012 15:20 (UTC +04:00)

Bakı. Ramil Məmmədli – APA. “Biz bəyan etmişik ki, müxalifətin birliyi üçün əvvəlcə vahid komanda, bundan sonra vahid namizəd məsələsi həll olunmalıdır”.

Bunu APA-ya açıqlamasında Ümid Partiyasının sədri İqbal Ağazadə deyib. O bildirib ki, Ümid Partiyası müxalifətin birliyi üçün ciddi şəkildə səy göstərən və bu istiqamətdə iddia və maraqlarını qorumağı bacaran təşkilatdır: “Lakin müxalifətin əsas partiyaları vahid komandanı prinsip etibarı ilə qəbul etsələr biz də iddia və maraqlarımızdan geri durmağa hazırıq. Təki Azərbaycanda demokratik cəmiyyət quruculuğu istiqamətində seçicinin və cəmiyyətin bütövlükdə gözlədiyi ümidlər özünü doğrultsun. Lakin bu olmayacağı təqdirdə də biz seçkiyə əliboş getmirik və qalib gəlmək üçün seçkiyə qatılacağıq”.

İ. Ağazadə qeyd edib ki, həm Ümid Partiyası, həm də “Qarabağ” bloku çərçivəsində 2013-cü ildə keçiriləcək prezident seçkilərinə hazırlıqla bağlı intensiv işlər davam etdirilir: “Bu proses mərkəzdə olduğu kimi, regionlarda getməkdədir. Ola bilsin ki, prosesi Azərbaycan seçicisi, siyasi təşkilatlar və media hay-küylü görmək istəyir. Ona görə də seçkiyə hazırlıq prosesində onu qane etməyən məqamlar yaranır. Amma bu gün dünya bir qədər fərqlidir. Yəni biz seçici ilə işləməyə üstünlük veririk. Güman edirik ki, bizim bu taktikamız ciddi uğur gətirəcək”.

İqbal Ağazadə