Daxili siyasət

Ana səhifə

Daxili siyasət

Ədalət Yusibov: “Mirmahmud Mirəlioğlu dedi ki, müsahibəmi gözlə”

08 oktyabr 2012 09:46 (UTC +04:00)

Bakı. Ramil Məmmədli - APA. “Klassik Xalq Cəbhəsi Partiyasının İdarə Heyətinin üzvlüyündən azad olunmağımla bağlı xəbərin mətbuata ötürülməsi siyasi manipulyasiya və alverdir”. Bunu APA-ya açıqlamasında (KXCP) sədrinin keçmiş müavini, partiya daxilində fəaliyyət göstərən “Demokratik Birlik” fraksiyasının həmtəsisçisi, Salyan rayon təşkilatının sədri Ədalət Yusibov deyib.

Ötən gün keçirilən partiya Ali Məclisinin sessiyası ilə bağlı danışan Ə. Yusibov bildirib ki, ilk dəfədir KXCP Ali Məclisinin sessiyası qapalı keçirilib və bu düzgün hal deyil: “Məntiqlə qapalı sessiyada ancaq Ali Məclisə aid məsələlər müzakirə olunmalı və hər şeyin qapalılığı təmin edilməli idi. Həm partiyama hörmət olaraq, həm də öz əxlaqıma uyğun olaraq sessiyada baş verənləri mahiyyəti üzrə açıb, mətbuata ötürməkdən müəyyən qədər vaz keçirəm. Lakin açıqlanan rəsmi məlumatlar var ki, obyektivliyi qətiyyən özündə ehtiva etmir”.

Ə.Yusibov qeyd edib ki, KXCP nizamnaməsinə görə, Ali Məclis vəzifəli şəxslərin istefasını qəbul edir: “Yəni mən istefamı sədrə təqdim etmişdim, sadəcə Ali Məclis bunu təsdiq edib. Sədrin müavinliyindən istefa vermiş şəxsin İdarə Heyətinin üzvlüyündən çıxarılması barədə qərardan isə söhbət gedə bilməz. İdarə Heyətinin formalaşdırılmasının qaydalarında da bu göstərilir. İdarə Heyətinə KXCP sədri rəhbərlik edir və bu qurum sədrin müavinlərindən, Ali Məclisin rəhbərliyindən və sədrin təqdimatı ilə Ali Məclis tərəfindən təsdiq olunmuş sərbəst üzvlərdən ibarət olur. Yəni İdarə Heyətində yalnız və yalnız müavin olduğuma görə təmsil olunmuşam. Müavin olaraq İdarə Heyətinin üzvü oluram, müavinlikdən çıxıramsa, avtomatik olaraq İdarə Heyətinin üzvlüyündən də kənarlaşıram”.

Ə.Yusibov digər müzakirə olunan məsələlərlə bağlı fikir söyləmək istəməyib: “Bunlarla əlaqədar KXCP sədri Mirmahmud Mirəlioğlu ilə ötən axşam telefon danışığım olub. Bütün bunlarla bağlı onun mövqeyini gözləyirəm. Belə xəbərlərin yayılmasına təəssüf edirəm. Ola bilsin ki, mətbuat konfransı keçirib, fikirlərimi açıqlayacağam. Amma Mirmahmud Mirəlioğlunun məsələlərlə bağlı açıqlamasını gözləyirəm. Məndən xahiş edib ki, müsahibəmi gözlə”.

Qeyd edək ki, KXCP mətbuat xidmətinin məlumatında partiya Ali Məclisinin Ədalət Yusubov, Rüfət Sahiboğlu, Fikrət Cəfərov, Qaya Əliyev və Rafiq Abdullanın İdarə Heyəti üzvlüyündən azad edilməsi haqqında qərar qəbul etdiyi haqda xəbər yer alıb.