Daxili siyasət

Ana səhifə

Daxili siyasət

Heydər Əliyev Mərkəzinin fəaliyyət istiqaməti, vəzifələri və strukturu açıqlanıb - ƏSASNAMƏ

Heydər Əliyev Mərkəzinin fəaliyyət istiqaməti, vəzifələri və strukturu açıqlanıb - <font color=red>ƏSASNAMƏ</font>

09 oktyabr 2012 06:35 (UTC +04:00)

APA-nın xəbərinə görə, 2013-cü il və növbəti illərdə dövlət büdcəsinin layihəsində Heydər Əliyev Mərkəzinin fəaliyyətinin maliyyələşdirilməsi üçün ayrıca sətirlə müvafiq vəsaitin nəzərdə tutulması da təmin ediləcək.

Əsasnamədə göstərilib ki, Mərkəz bilavasitə Azərbaycan Prezidentinə tabe olan və onun qarşısında hesabat verən dövlət qurumudur.

Mərkəz fəaliyyətində Azərbaycan Konstitusiyasını, ölkənin tərəfdar çıxdığı beynəlxalq müqavilələri, ölkə qanunlarını, prezidentin fərman və sərəncamlarınını, Nazirlər Kabinetinin qərar və sərəncamlarını, həmçinin Əsasnaməsini rəhbər tutur.

Təşkilat digər dövlət orqanlarının məxsus olduğu imtiyaz və səlahiyyətləri malikdir. Mərkəz yerli, xarici və beynəlxalq təşkilatlarla, hüquqi və fiziki şəxslərlə qarşılıqlı əlaqədə fəaliyyət göstərəcək.

Mərkəzin fəaliyyət istiqaməti Azərbaycan xalqının ümummilli lideri Heydər Əliyevin həyat və fəaliyyəti ilə bağlı tarixi əşyaların və maddi mədəniyyət abidələrinin komplektləşdirilməsi, mühafizəsi, öyrənilməsi, kütləvi nümayişi və təbliğidir. Həmçinin Heydər Əliyevin dövlətçilik fəlsəfəsi və azərbaycançılıq məfkurəsinin, irsinin dərindən öyrənilməsi, tədqiqi, geniş təbliği, qorunub saxlanılması və hərtərəfli inkişaf etdirilməsi, bunun dövlət siyasətinin ayrı-ayrı sahələrində tətbiqi də Mərkəzin fəaliyyət istiqamətlərinə daxildir.

Mərkəz eyni zamanda Azərbaycan tarixi, mədəniyyəti, dili və digər milli sərvətlərinin beynəlxalq aləmdə tanıdılması və təbliğində, elm, təhsil, mədəniyyət, səhiyyə, idman, ekologiya və iqtisadiyyatın müxtəlif sahələrinə dəstək verilməsi və onların inkişaf etdirilməsinə xidmət edən layihələrin həyata keçirilməsində iştirak edəcək, yerli, regional və beynəlxalq tədbirləri keçirəcək.

Əsasnaməyə görə, mərkəzin daim yenilənən informasiya resursu yaradılacaq və fəaliyyət planı hazırlanacaq.

Əsasnamə Mərkəzə fəaliyyət istiqamətlərinə uyğun müxtəlif mükafatlar, fəxri adlar və təltiflər təsis etmək, nəşrlər buraxmaq, habelə kütləvi informasiya vasitələri təsis etmək hüququ verir. Eyni zamanda Mərkəzin fəaliyyət istiqamətlərinə uyğun olaraq konfrans, simpozium, muzey, sərgi, ekspozisiya və digər tədbirlər təşkil edilə bilər.

Sənəd həmçinin Mərkəzin vəzifələrinin yerinə yetirilməsi və hüquqlarının həyata keçirilməsi məqsədilə qrantlar, ianələr və digər əvəzsiz köçürmələri almaq, qrantlar, ianələr və təqaüdlər təsis etmək hüququ da tanıyır.

Mərkəz fəaliyyətinə aid olan məsələlərə dair müstəqil ekspertləri və mütəxəssisləri cəlb edə biləcək.

Mərkəz öz fəaliyyətini aparatı və tabeliyində olan qurumları vasitəsilə həyata keçirəcək. Mərkəzin aparatının işçilərinin say həddi 154 ştat vahidi müəyyən edilib. Mərkəzin fəaliyyətinə Azərbaycan Prezidenti tərəfindən vəzifəyə təyin edilən direktor rəhbərlik edir. Eyni zamanda direktorun birinci müavini və bir müavinini də prezident vəzifəyə təyin edir.

Mərkəzdə direktordan (Direktorlar Şurasının sədri), direktorun müavinlərindən, struktur bölmələrinin və tabeliyində olan qurumların rəhbərlərindən ibarət Direktorlar Şurası yaradılır. Direktorlar Şurasının üzvlərinin sayı və tərkibi direktor tərəfindən müəyyən olunur.

Mərkəzin əmlakı ona təhkim edilmiş dövlət əmlakından, dövlət büdcəsindən məqsədli təyinatla ayrılan vəsaitlərdən, fəaliyyət istiqamətlərinə uyğun olaraq görülən işlərdən, göstərilən xidmətlərdən əldə edilən daxilolmalardan, qanunvericiliklə nəzərdə tutulan digər mənbələrdən daxil olan vəsaitlərdən ibarətdir.

Mərkəz öz vəzifələrini yerinə yetirmək məqsədi ilə büdcədənkənar vəsaitləri, hüquqi və fiziki şəxslərin, o cümlədən xarici hüquqi və fiziki şəxslərin, beynəlxalq təşkilatların qrant və ianələrini istifadə etməklə xüsusi fondlar yaratmaq və onlardan istifadə etmək hüququna malikdir.

Mərkəz Azərbaycanda və xarici ölkələrdə nümayəndəliklər təsis edə bilər.