Daxili siyasət

Ana səhifə

Daxili siyasət

Gülər Əhmədova: “Mən Yeni Azərbaycan Partiyasına sadiqəm” – YENİLƏNİB

Gülər Əhmədova: “Mən Yeni Azərbaycan Partiyasına sadiqəm” – <font color=red>YENİLƏNİB</font>

09 oktyabr 2012 12:54 (UTC +04:00)

APA-nın məlumatına görə, bunu bu gün yaydığı rəsmi açıqlamasında sabiq millət vəkili Gülər Əhmədova bildirib.

G.Əhmədova açıqlamasının kontekstdən çıxarıldığını deyib: “Bütün yazılanlara aydınlıq gətirmək məqsədilə mən, Gülər Mikayıl qızı Əhmədova bildirirəm ki, heç vaxt “Məndə də videolar var, yaya bilərəm” məzmunlu açıqlama verməmişəm. Mənə israrla zəng edən jurnalist xanıma bildirmişəm ki, bir vaxtlar bəzi qəzet baş redaktorları, habelə jurnalistləri barədə də videolar yayılanda “Mərkəz” qəzeti və saytı olaraq, həmin videoları dərc etməmişik. Həmin videoları yaya bilərdik, amma bunu etməmişik. Jurnalist xanım mənim bu açıqlamamı kontekstdən çıxardaraq, bilərəkdən və ya bilməyərəkdən təhrif edib ictimaiyyətə yanlış formada təqdim edib. Daha sonra digər resurslar bu yanlış informasiya üzərində təməli səhv analizlər aparmağa başlayıblar. Mən barəmdə yazılan həmin açıqlamanı qəti şəkildə təkzib edirəm”.

G.Əhmədova “Facebook” statusunda yazdıqlarının YAP-ın icra katibi Əli Əhmədovla əlaqələndirilməsinə də münasibət bildirib: “Etiraz etdiyim digər məsələ də mənim üzvü olduğu Yeni Azərbaycan Partiyasının rəhbər şəxsi ilə mənim aramdakı münasibətləri qəsdən pozmaq cəhdidir. Belə ki, mən “Facebook” sosial şəbəkəsində özümə məxsus səhifəmdə zarafatyana və sırf dostlarımla müzakirə aparmaq məqsədilə bir şeir paylaşmışdım. Bu, sadəcə bir şeir idi və heç bir şəxsə və ya şəxslərə, habelə quruma və ya təşkilata ünvanlanmayıb. Çox təəssüf edirəm ki, yenə də yuxarıda adını çəkdiyim həmin qəzet mənim “Facebook” sosial şəbəkəsində paylaşdıqlarımı yanlış istiqamətə yozaraq, ictimaiyyətdə barəmdə qərəzli münasibət formalaşdırmağa çalışıb. Bir daha bütün KİV və ictimaiyyət nümayəndələrini əmin edirəm ki, “Facebook” sosial şəbəkəsində paylaşdığım fikirlər bir vətəndaş kimi dostlarımla müzakirə aparmaq məqsədi daşıyır və heç bir alt məna kəsb etmir”.

G.Əhmədova qeyd edib ki, o, mənsub olduğum Yeni Azərbaycan Partiyasına, onun nizamnamə və məramnaməsinə sadiqdir: “Mən mənsub olduğum Yeni Azərbaycan Partiyasına, onun nizamnamə və məramnaməsinə sadiqəm və həmişə də sadiq qalacam. İstintaq getdiyindən heç bir açıqlama verməmək qərarına gəlmişəm və hər hansı açıqlamanın istintaqın gedişinə təsir edəcəyini düşünürəm. Odur ki, bütün jurnalistlərdən, KİV nümayəndələrindən xahiş edirəm ki, məndən hər hansı açıqlama almaq istəklərini istintaqın bitməsinə qədər saxlasınlar və barəmdə yazılan şayiələri xəbərə çevirib ictimaiyyətin və istintaqın fikrini yanlış istiqamətə yönəltməsinlər”.

Öz növbəsində “Yeni Müsavat” qəzetinin baş redaktoru Rauf Arifoğlu Musavat.com portalına açıqlamasında Gülər Əhmədovanın ittihamlarına cavab verib. Onun sözlərinə görə, sabiq deputat Gülər Əhmədova artıq neçənci dəfədir ki, qəzeti hədəfə alan ittihamlarla çıxış edir: “Bu, məni təəccübləndirir, lakin məqsədini anlayıram. Gülər Əhmədova belə bir görüntü yaratmaq istəyir ki, o, müxalifət düşərgəsinin hədəfindədir, hər şeyi bu düşərgəyə aid bir qəzet mürəkkəbləşdirir. Əslində isə onun vəziyyətini özü, düşünülməmiş hərəkətləri və açıqlamaları ilə, pisləşdirir. “Yeni Müsavat”, eləcə də digər KİV-lər ölkənin gündəmini dəyişən, konkret bir cinayət əməli barədə yazılar yazır, bu əməldə əsas şübhəli bilinən Gülər Əhmədova və Elşad Abdullayevin hərəkətlərini izləyərək, onları əks etdirməyə çalışır. Bu məsələdə bizim xüsusi qərəzimiz yoxdur, ola da bilməz. Üstəlik, hörmətli Gülər xanım haqqında onun partiya yoldaşlarından, iqtidar mənsublarından kəskin ifadələr işlətməmişik. Dövlətin və hakim partiyanın rəhbərləri Gülər Əhmədovanın məlum videodakı hərəkətlərini konkret olaraq dələduzluq kimi qiymətləndirmiş, onun bu cinayəti törətdiyini etiraf etmişlər. Hazırda onun mandatı əlindən alınmış (nə qədər desə də ki, mən özüm mandatdan imtina etmişəm, buna kimsə inanmır), barəsində cinayət işi açılmış, ölkədən çıxmasına yasaq qoyulmuşdur. Belə bir vəziyyətdə əsas məsələləri, taleyi ilə bağlı hökm verənlərin münasibət və qərarlarını kənarda buraxaraq, bir qəzeti hədəfə alması yersiz və gülünc görünür. Gülər xanımın problemi “Yeni Müsavat” qəzeti deyil. Onun problemi başqadır və yaxşı olar ki, onlarla məşğul olsun.

Elşad Abdullayevə gəlincə isə, əslində “Yeni Müsavat”la problemi olan instansiya məhz o olmalıdır. Çünki onun bu ilin əvvəllərində “Azadlıq” qəzeti vasitəsilə yaydığı müvafiq açıqlamaları məhz bizim qəzet əks-arqumentlərlə vurmuşdu. Bu səbəbdən bizimlə E.Abdullayev arasında ciddi konfliktlər yaşanmış, məsələ məhkəmə təhdidlərinə qədər gedib çıxmışdı. Lakin artıq onun ortaya çıxartdığı faktlar o dərəcədə təkzibolunmaz, o dərəcədə aydındır ki, hətta Gülər xanımın partiyadaşları, yaxın dostları da ona heç bir dəstək verə bilmirlər. Biz də bir qəzet olaraq olanları yazır, oxucu tələbatından çıxış edərək, bir sıra gizlinlərə işıq tuturuq. Eləcə də onun “Facebook” səhifəsində yazdığı “Xoruz baba” statusunun şifrəsini də biz çözmüşük. Təbii ki, bu cür fəaliyyətimiz Gülər xanıma xoş gəlmir, bu səbəbdən də üzərimizə hücum edir. Lakin bu dəfə də yanlış yapır. Onun üçün ən yaxşı olan budur ki, indiki anda heç olmasa sussun, istintaqın nəticələrini gözləsin, sağa-sola hücum etməsin. Bundan belə hansı hərəkəti etsə, yenə də öz vəziyyətini pisləşdirəcək”.