Daxili siyasət

Ana səhifə

Daxili siyasət

Demokratik Qüvvələrin Məşvərət Məclisinin təklifləri İctimai Palatada fikir ayrılığı yaradıb

10 oktyabr 2012 11:45 (UTC +04:00)

Bakı. Etibar Məmmədov - APA. Demokratik Qüvvələrin Məşvərət Məclisi (DQMM) İctimai Palataya (İP) əməkdaşlıq haqqında məktub ünvanlayıb.

Azərbaycan Milli İstiqlal Partiyasının (AMİP) sədri Yusif Bağırzadə APA-ya açıqlamasında bildirib ki, məktub Məclisə daxil olan 14 partiya adından ünvanlanıb. Y.Bağırzadənin sözlərinə görə, rəsmi müraciət ünvanlanmasına baxmayaraq, hələ də qarşı tərəfdən cavab gəlməyib: “ İctimai Palata ilə əməkdaşlığı əks etdirən məktubda ölkədəki ictimai-siyasi vəziyyətlə bağlı əməkdaşlıq, Seçki Məcəlləsinə əlavə dəyişikliklərin edilməsi, seçki mühitinin demokratikləşməsi məsələləri öz əksini tapıb”.

İP-in Koordinasiya Şurasının (KŞ) üzvü Pənah Hüseyn həmin məktubun mətni ilə tanış olduğunu bildirib. Onun sözlərinə görə, müraciətdə konkret təklif irəli sürülməyib: “Müraciətdə demokratikləşmə istiqamətində əməkdaşlıq təklif olunur. Biz Koordinasiya Şurasının üzvləri ilə müzakirələr apardıq və müraciətin qəbul edilməsi ilə bağlı qərar verdik. Bir daha qeyd edirəm ki, orada konkret bir hərəkət, təklif, detal olmayıb”.

İP KŞ-ın digər üzvü Vidadi Mirkamal isə APA-ya açıqlamasında həmin müraciətdəki təkliflərlə razılaşmadığını deyib: “Məşvərət Məclisinin təklifində bildirilirdi ki, müxalifətin birləşməsi üçün ümumi Koordinasiya Şurası yaradılmalı və onun tərkibinə 2 nəfər Məşvərət Məclisindən, 2 nəfər İctimai Palatadan, 2 nəfər isə ictimaiyyət nümayəndəsi daxil olmalıdır. Düşünürəm ki, bu, mümkün olmayan bir şeydir. Çünki İctimai Palata özü ciddi və kifayət qədər uğur qazanmış bir qurumdur. Ona görə də quruluşu və gələcəyi bilinməyən Məşvərət Məclisinin təkliflərini qəbul edə bilmərik”.