Daxili siyasət

Daxili siyasət

Əli Əhmədov: “Gülər Əhmədova ilə bağlı məsələyə YAP Yasamal rayon təşkilatında baxılacaq”

11 oktyabr 2012 09:34 (UTC +04:00)

Bu fikirləri APA-nın sualına cavabında hakim Yeni Azərbaycan Partiyasının (YAP) sədr müavini-icra katibi Əli Əhmədov deyib. O, xatırladıb ki, artıq YAP-ın fəal üzvləri də bununla bağlı fikirlərini səsləndiriblər: “YAP-ın üzvləri ilə əlaqədar qərarları, o cümlədən inzibati qərarları partiyanın Nizamnaməsinə uyğun şəkildə müvafiq qurumlar verir. İndiki halda – partiyanın sıravi üzvü ilə bağlı partiyadan kənarlaşdırma və ya ciddi tənbeh tədbirləri ilə bağlı qərarların qəbul olunması partiyanın ilk təşkilatlarının səlahiyyətindədir. Gülər Əhmədova YAP-ın sıravi bir üzvüdür, Yasamal rayon təşkilatında qeydiyyata alınıb. Onunla bağlı məsələyə məhz həmin təşkilatda baxılacaq. Güman edirəm ki, ilk təşkilatda aparılacaq müzakirələr nəticəsində düzgün və obyektiv qərar qəbul olunacaq. Düşünürəm ki, onların qərarı hər hansı bir basqı olmadan qəbul ediləcək. Güman edirəm ki, yaxın müddətdə Yasamal rayon təşkilatı bu məsələyə münasibətini bildirəcək və müvafiq qərar qəbul edəcək”.

Xatırladaq ki, sentyabrın 25-də internetdə E. Abdullayev, deputat Gülər Əhmədova və Sabir adına Kitabxananın direktoru Sevinc Babayeva ilə bağlı video material yayılıb. Video materialda deputatla sabiq rektor və vasitəçi kimi təqdim olunan S. Babayeva arasında E. Abdullayevin Milli Məclisin üzvü seçilməsi üçün yüksək məbləğdə rüşvət verməsi, ondan əlavə məbləğ istənilməsi barədə dialoq əksini tapıb. Qeyd edilən audio və videoyazılarda dələduzluğun, yəni etibardan sui-istifadə etmə yolu ilə özgə əmlakını ələ keçirmənin əlamətləri olduğundan həmin məlumatların hərtərəfli, tam və obyektiv araşdırılmasını təmin etmək məqsədilə çoxsaylı təxirəsalınmaz istintaq və istintaq-əməliyyat tədbirlərinin keçirilməsinin zəruriliyini nəzərə alaraq toplanmış material üzrə Cinayət Məcəlləsinin 178.3.2-ci (etibardan sui-istifadə etməklə özgənin külli miqdarda əmlakını ələ keçirmə) maddəsi ilə cinayət işi başlanıb. G. Əhmədova mandatından imtina edib. Mərkəzi Seçki Komissiyası G. Əhmədovanın istəyi ilə onu deputatlıq mandatından məhrum edib.