Daxili siyasət

Ana səhifə

Daxili siyasət

Aydın Mədətoğlu: “Fraksiyanın müşavirəsinin Müsavat qərargahında keçirilməsinin əleyhinə idim”

15 oktyabr 2012 10:26 (UTC +04:00)

Bakı. Ramil Məmmədli – APA. “Demokratik Birlik” fraksiyanın müşavirəsinin Müsavat Partiyasının qərargahında keçirilməsinin ilk günlərdən tərəfdarı olmamışam. Təklif edirdim ki, müşavirə Klassik Xalq Cəbhəsi Partiyasının qərargahında keçirilsin”. Bunu APA-ya açıqlamasında fraksiyanın həmtəsisçisi, KXCP sədrinin müşaviri Aydın Mədətoğlu deyib.

O bildirib ki, fraksiyanın geniş tərkibli yığıncağının keçirildiyi gün gənclərin qurultayında olub. Ora dəvət edildiyindən fraksiyanın iclasında iştirak edə bilməyib: “Çünki gənclər iştirakımla bağlı çox israr etmiş və tədbirə Mirmahmud Mirəlioğlunu da dəvət etmişdilər. Onun bu toplantıda iştirak etmək imkanı olmadığından, Mirmahmud bəyi də orada mən təmsil edirdim. Ona görə də mütləq şəkildə qurultayda iştirak etməliydim”.

A.Mədətoğlu qeyd edib ki, fraksiya təsis olunduğu zaman qurumun şəxsi məqsədlər üçün istifadə edilməməsinə dair razılıq əldə olunub: “Bu, şəxsi münasibətlərlə bağlı təşkilat deyil, cəmiyyəti düşündürən məsələlərin həllinə yönələn qrupdur. Fraksiyanın şəxsi məqsədlər müstəvisinə çevirmək və ideyasını kiçiltmək yolverilməzdir, mən bunun əleyhinəyəm”.

A.Mədətoğlu “Demokratik Birlik”in həmtəsisçisi Fikrət Cəfərovun KXCP-dən xaric olunması ilə bağlı fraksiya adından yayılan bəyanata da münasibətini bildirib: “Fraksiya yarandığı gündən qrup adından üç sənəd açıqlanıb. Bundan başqa fraksiya adından hər hansı bir açıqlama olmayıb. Mənim fraksiya adından hər hansı bəyanat verilməsindən xəbərim yoxdur və bunu da düzgün hesab etmirəm. Ümid edirəm ki, bu həqiqət deyil, əgər belə bir addım atılıbsa da səhvdir”. O, fraksiyanın bəzi həmtəsisçiləri ilə Mirmahmud Mirəlioğlu arasında yaranan narazılığın da fraksiya adından cavablandırılmasının tərəfdarı olmadığını söyləyib: “Qarşılıqlı münasibətlərin çözülməsi üçün ikitərəfli danışıqlar aparılmalıdır. Bunun təşkilat adından səsləndirilməsi qurumun fəaliyyətinə xələl gətirə bilər”.

Qeyd edək ki, iki əvvəl fraksiyanın Müsavat Partiyasının qərargahında keçirilən müşavirəsində Aydın Mədətoğlu iştirak etməyib. Həmçinin bu gün Fikrət Cəfərovun partiyadan çıxarılması ilə bağlı KXCP-də fəaliyyət göstərən “Demokratik Birlik” fraksiyası adından bəyanat verilib. Bəyanatda KXCP sədri Mirmahmud Mirəlioğlu sərt şəkildə tənqid olunub.