Daxili siyasət

Ana səhifə

Daxili siyasət

AMİP rəhbərliyi Avropa Xalq Partiyasının qurultayında iştirak edib

22 oktyabr 2012 13:36 (UTC +04:00)

Bakı. Ramil Məmmədli – APA. Azərbaycan Milli İstiqlal Partiyasının (AMİP) rəhbərliyi Avropa Xalq Partiyasının (AXP) qurultayında iştirak edib.

Partiyanın mətbuat xidmətindən APA-ya verilən məlumata görə, AMİP sədri Yusif Bağırzadə, baş katib Arzuxan Əlizadə, beynəlxalq məsələlər üzrə katib Elşən Mustafayev AXP-nin Rumıniyanın paytaxtı Buxarest şəhərində keçirilən növbəti qurultayında iştirak ediblər.

Səfər AXP-nin rəsmi dəvəti ilə baş tutub. Oktyabrın 16-dan 19-dək davam edən səfər çərçivəsində AMİP nümayəndə heyəti AXP rəhbərliyində təmsil olunan bir sıra rəsmi şəxslər, eyni zamanda ayrı-ayrı üzv ölkələrin nümayəndə heyətlərinin rəhbərləri ilə görüşlər keçirib. Görüşlərdə AMİP-in AXP-yə qəbulu, partiyalararası əlaqələr, Dağlıq Qarabağ problemi və digər məsələlər müzakirə olunub.

Qurultayın işində bir sıra dövlət və hökumət başçıları, o cümlədən Rumıniya, Gürcüstan və Ermənistan prezidentləri, Almaniya kansleri, İsveç, Macarıstan, Albaniya, Moldova, Bolqarıstan, Portuqaliya, Latviya, Sloveniya, Xorvatiya, Liviyanın baş nazirləri, Avropa Komissiyasının prezidenti, Avropa Şurasının sədri, ayrı-ayrı ölkələrin hökumət üzvləri və digər rəsmi şəxslər iştirak və çıxış edib.

Çıxışlar əsasən 2012-ci ilin prioriteti olan daha güclü və böyük Avropaya nail olmaq, iqtisadi böhran, onu yaradan səbəblər və ondan çıxış yolları, təhsil, səhiyyə məsələləri, gələcək nəsillərə sağlam və qüdrətli Avropanın ötürülməsi, konfliktlərin həlli, dövlətlərarası müttəfiqlik, Avropa dövlətlərinin həmrəyliyi və beynəlxalq münasibətlərin inkişafı və sairə kimi aktual məsələlər ətrafında olub.

Qurultayda rəhbər orqanlara seçkilər keçirilib. Səsvermənin nəticələrinə əsasən Vilfrid Martens növbəti dəfə AXP-nin prezidenti, Antonio Lopez İsturiz baş katibi seçilib.

AXP-nin sammitinin Avstriyanın paytaxtı Vyana şəhərində keçirilməsi qərara alınıb.