Daxili siyasət

Ana səhifə

Daxili siyasət

Vidadi Mirkamal: «İctimai Palata Koordinasiya Şurasının səmərəliliyi çox aşağıdır»

03 noyabr 2012 12:14 (UTC +04:00)

Bakı. Etibar Məmmədov - APA. Bu gün İctimai Palatanın növbəti sessiyası keçirilib. APA-nın məlumatına görə, sessiyada Milli Məclisin qəbul etdiyi «Sərbəst toplaşmaq azadlığı haqqında» qanun, İctimai Palatanın (İP) fəaliyyəti və qarşıda duran vəzifələr barədə müzakirələr aparılıb.

Toplantıda çıxış edən Azərbaycan Xalq Cəbhəsi Partiyasının (AXCP) sədri Əli Kərimli İP daxilindəki müzakirələri kənara qoyub, əsas qüvvənin hədəfə yönəldilməyinin və seçkilərdə islahatlara nail olmağın vacibliyini vurğulayıb: «Bütün vasitələrdən maksimum istifadə edilməlidir. Biz çalışmalıyıq ki, bütün qüvvələr İctimai Palata ətrafında birləşsin. Biz məqsədlərimizə doğru gedərək, seçki islahatlarına nail olmalıyıq. Artıq İctimai Palatanın Vahid Seçki Platformasının yaradılması haqqında qərar vermişik».

Ə.Kərimli həmçinin, dünənki piketi və indiyədək keçirilən aksiyaları yüksək qiymətləndirib.

İP Koordinasiya Şurasının (KŞ) üzvü Vidadi Mirkamal isə çıxışında Şuranın fəaliyyətini tənqid edib. O, vəzifələr və strukturda labüd dəyişikliklərdən danışıb. Onun sözlərinə görə, İP strukturundakı mövcud standartlarla güclü birliyə çevrilə bilməz. V.Mirkamal vahid seçki qərargahı və vahid seçki platformasının yaradılmasını təklif edib: «İctimai Palata mövcud standartlarla çox uzağa gedə bilməz. Sessiya 1 ayda bir dəfə çağırılır. İlk növbədə sessiyanın üzvlərinin hamısının yığıncaqlarda iştirakını təmin etmək lazımdır. Koordinasiya Şurasının səmərəliliyi çox aşağıdır. Sessiya üzvlərindən bu şuranın fəaliyyətinə nəzarət edən komitə yaradılmalıdır və onun fəaliyyəti gücləndirilməlidir».

Toplantıda digər çıxışlar da dinlənilib.