Daxili siyasət

Ana səhifə

Daxili siyasət

Pənah Hüseyn “Müsavat” deputat qrupunun koordinatorluğundan istefa verib

28 iyun 2007 15:30 (UTC +04:00)

Millət vəkili Pənah Hüseyn “Müsavat” deputat qrupunun koordinatorluğundan istefa verib. O, APA-ya açıqlamasında bildirib ki, buna səbəb koordinator kimi səlahiyyətinin başa çatmasıdır. Deputat qrupunun əsasnaməsinə görə, koordinatorun 6 ay müddətinə seçildiyini deyən P. Hüseyn növbəti koordinatorun payızda müəyyənləşəcəyini söyləyib. O, istefasının başqa səbəbləri olub-olmadığı ilə bağlı suala “cavabım kifayət qədər əsaslıdır və başqa məsələlər üzərində dayanmağa ehtiyac yoxdur” cavabını verib. P. Hüseyn Müsavat Partiyasının rəhbərliyində təmsil olunan şəxslərlə aralarında müəyyən fikir ayrılıqlarının olduğunu da etiraf edib: “Mən müsəlman-demokrat ideyası ilə çıxış edirəm. Amma Müsavatda bir sıra rəhbər şəxslər bu fikirlə razılaşmır”. Konkret şəxslərin üzərində dayanmaq istəmədiyini deyən deputat bu mövqedə olan şəxslərin partiyada əksəriyyət təşkil etdiyini söyləyib. Buna baxmayaraq, o, Müsavatla əlaqələrini davam etdirəcəyini də açıqlayıb: “Çünki müxalifətdə mənə ən yaxın siyasi qüvvə məhz Müsavat Partiyasıdır. Fikirləri üst-üstə düşməyən xeyli müxalifət qüvvələri var ki, onlarla da münasibətlər davam edir”.
Məsələyə münasibət bildirən Müsavatın Mərkəzi İcra Aparatının rəhbəri Arif Hacılı partiyanın ideoloji xəttinin proqramda öz əksini tapdığını bildirib: “Ona görə də buna zidd mövqedən çıxış etmək fikrimiz yoxdur. Ümumilikdə isə müsəlman-demokrat ideologiyasının özündə qeyri-müəyyənlik var. Müsavatın islama qarşı olduğunu demək olmaz, çünki partiyanın prinsiplərində islamçılıq da öz əksini tapıb”. /APA/