Daxili siyasət

Ana səhifə

Daxili siyasət

Prezident İlham Əliyev: “2005-ci ildə Azərbaycanda inqilab etmək istəyən xarici və daxili qüvvələrə dövlət və xalq layiqli cavab verdi”

02 iyul 2007 10:05 (UTC +04:00)

APA-nın məlumatına görə, Azərbaycan prezidenti İlham Əliyev bu fikirləri Polis Akademiyasında Məzun Günü və 2 iyul Polis Günü münasibətilə keçirilən tədbirdə çıxışı zamanı söyləyib. Onun sözlərinə görə, bəzi “siyasətçilər”in dövlət çevrilişi cəhdini bir neçə rüşvətxor və xəyanətkar məmur dəstəkləyib: “Bu prosesdə bəzi xarici dairələr də iştirak edirdilər. O vaxt Azərbaycanda vəziyyətin gərginləşməsi, qanuni hakimiyyətin devrilməsi müzakirə olunurdu. Biz həmin vaxt onların bütün planlarını bilirdik və indi də bilirik”.
İlham Əliyev Azərbaycanda situasiyanın nəzarət altında olduğunu bildirib: “Elə bir məsələ yoxdur ki, biz onu bilməyək. O vaxt Azərbaycanda inqilab etmək istəyən qüvvələrə dövlət və xalq layiqli cavab verdi. İlk növbədə xalqın Azərbaycan iqtidarının siyasətini dəstəkləməsi dövlət çevrilişi etmək istəyən qüvvələrin planlarının alt-üst etdi, xoşagəlməz ssenarilərin qarşısı alındı. Əgər onların planları həyata keçsəydi, Azərbaycanı hansı bəlaların gözlədiyini təsəvvür etmək çətin deyildi. Çevriliş olan ölkələrdə görürük ki, daxili çəkişmələr var, iqtisadiyyat yoxdur, inkişafdan söhbət gedə bilməz. Azərbaycanda isə vəziyyət tam başqadır. İqtisadiyyatımız inkişaf edir, regional müstəvidə böyük rol oynayırıq, iqtisadi layihələr həyata keçirilir. Əgər çevriliş planı həyata keçsəydi, heç kim Azərbaycan iqtisadiyyatına bu qədər sərmayə qoymazdı. Bakı-Tiflis-Ceyhan neft və Bakı-Tiflis-Ərzurum qaz kəmərləri tikilməyəcəkdi. Biz nəinki Avropanı, hətta özümüzü də qazla təmin edə bilməyəcəkdik”. Prezident ölkədə qanunsuz hərəkətlərin qarşısının alınmasında Azərbaycan polisinin əsas rol oynadığını vurğulayıb: “O vaxt polis çox böyük qətiyyət və cəsarət nümayiş etdirdi. Mənim yadımdadır, bəzi xarici təşkilatlar bizə təzyiq göstərirdilər ki, kobudluq göstərən polis əməkdaşları cəzalandırılsın və həbs olunsunlar. Amma mən bütün bu tələbləri rədd edib dedim ki, bir nəfər də olsun, polis əməkdaşı həbs olunmayacaq. Çünki, onlar öz vəzifə borclarını yerinə yetirərək dövlətin keşiyində və qanunun müdafiəsində durublar. Mən bu gün də Azərbaycan polisini dəstəkləyirəm”. /APA/