Daxili siyasət

Daxili siyasət

ABŞ Dövlət Departamenti insan haqları və demokratiya ilə bağlı növbəti hesabatını yayıb

29 may 2008 10:09 (UTC +04:00)

Departamentin hesabatında göstərilənə görə, ötən il Azərbaycanda 4 nəfər hüquq-mühafizə orqanlarında işgəncə faktının qurbanı olub. Hesabatda infrastrukturun inkişaf etdiyi və bəzi islahatlar aparıldığı bildirilib. Amma bütün bunlara baxmayaraq, məhkəmələrdəki vəziyyətdən, həmçinin insanların məhkəmə hökmü olmadan saxlanılması hallarından, jurnalistlərin konkret cinayət maddələri ilə həbsindən, jurnalist Elmar Hüseynovun qatillərinin tapılmamasından narahatlıq ifadə olunub. ABŞ medianın peşəkarlığının artırılması ilə bağlı dəstəyini davam etdirəcəyini bildirib.
Sənəddə məhkəmə və hüquq sistemindəki çatışmazlıqlar, sərbəst toplaşma azadlığına məhdudiyyət, 2007-ci ildə media ilə bağlı problemlər, bir sıra qeydiyyatsız dini icmaların fəaliyyətinə məhdudiyyətlər tətbiq edilməsi, qadınlara qarşı zorakılıq hallarından bəhs edilib. İnsan alveri hallarına qarşı Azərbaycan hökumətinin mübarizə apardığının qeyd edildiyi sənəddə ABŞ-ın problemin aradan qaldırılması üçün dəstəyini davam etdirdiyi vurğulanıb.
Hesabatda göstərilib ki, ABŞ hökuməti insan haqları və demokratiya strategiyası çərçivəsində demokratik inkişafın beş əsas sektoruna dəstək verməyi nəzərdən keçirir. Bunlar demokratik siyasi proseslər, qanunin aliliyi və korrupsiyaya qarşı mübarizə, insan haqları və fundamental azadlıqlar, mətbuat azadlığının təmin olunması və yüksək təhsilli vətəndaş cəmiyyətin qurulması ilə bağlı sahələrdir.
Sənəddə o da vurğulanıb ki, ABŞ Azərbaycan hökumətinin mətbuatla münasibətinin normallaşması, müstəqil və peşəkar medianın inkişafı istiqamətində səylərini davam etdirir. Eyni zamanda ABŞ-ın Azərbaycanda bu il prezident seçkilərinin şəffaf və azad, sərbəst toplaşma azadlığının tam bəraqarər olduğu şəraitdə, beynəlxalq standartlara cavab verəcək səviyyədə keçirilməsinə səy göstərdiyi də qeyd olunub.
Hesabatda bildirilib ki, ABŞ demokratiya və insan haqları ilə bağlı sahələrdəki vəziyyətlə bağlı Azərbaycan hökuməti ilə müntəzəm dialoqlar aparır.